2 lalaki gitipi

DUHA ka mga lalaki ang gipusil patay sa wa mailhing mga mamumuno sa duha ka managlahing insidente dinhi sa siyudad sa Davao.

Ang usa ka biktima menor de edad kinsa gipikhan daplin sa kalsada samtang ang laing biktima usa ka musikero kinsa gipikhan sud sa ilang balay niadtong Biyernes.

Ang menor de edad giila sa pangalan nga John Rey Parillo, 17, nagpuyo sa SIR New Matina, Barangay 76-A Bucana, ning siyudad.

Base sa spot report sa Talomo Police Station, si Parillo gipusil sa wa mailhing lalaki samtang nagtindog duol sa Burger and Snack Station sa dalang Sandawa, Barangay 76-A Bucana.

Si SPO2 Ernesto Dayuno, duty investigator, nagbutyag sa iyang spot report nga naagian ang biktima sa 10 ka mga menor de edad, apan usa kanila ang mipusil sa biktima gamit ang sumpak ala 1:30 sa kaadlawon kagahapon.

Ang biktima naigo sa iyang dughan mao nga gidala siya sa Southern Philippines Medical Center (SPMC) apan gideklara nga dead on arrival sa maong tambalanan.

Human sa pagpamusil, suma sa report, nanagan dayon ang mga menor de edad ngadto sa wa masayri nga lugar.

Ang biktima kinsa gipusil sa wa mailhing mamumuno sud sa ilang balay mao si Anthony Roy Cañeda, 33, minyo, musikero, nagpuyo sa Blk 32, Lot 11, Rosalina Village, Barangay Baliok, ning siyudad.

Si PO2 Cirilo Flores, duty investigator sa Talomo Police Station, ang biktima nagpahulay sud sa ilang balay alas 9:30 sa buntag apan ang iyang pagpahuway nadisturbo tungod kay misulod ang wa mailhing mamumuno.

Matud ni Flores nga way daghang pangutana ang suspek, iyang gipusil ang biktima sa iyang likod ug dughan mao nga dali sab siyang gidala didto sa Malta Hospital sa Toril.

Tungod kay grabe ang kahimtang sa biktima, suma sa report, gibalhin siya didto sa Southern Philippines Medical Center apan alas 12:15 sa udto niadtong Biyernes, namatay ang biktima samtang gitambalan sa SPMC.

Nakuha sa kapulisan gikan sa crime scene ang duha ka basiyo sa bala sa .45 kalibre nga pistola nga maoy gigamit sa mamumuno.

Mga silingan nagbutyag nga ang mamumuno nagsul-ob og yellow nga t-shirt, checkered nga pantalon ug nagsul-ob og kalo kinsa daling mibiya sa maong lugar sakay sa usa ka kolor pula nga Sedan nga sakyanan.

Ang biktima atua karon gihaya sa St. Peter's Funeral Homes samtang ang kapulisan naningkamot nga masayran ang motibo sa mamumuno sa duha ka mga krimen nga nahitabo sa area of responsibility sa Talomo Police Station. (AD)