GIPAKITA ni Mayor Val Chiong ngadto sa mga sakop sa media ug kang Mayor Eddie Selma sa Minglanilla ang pribadong Material Recovery Facility (MRF) sa Syudad sa Naga diha sa Barangay Pangdan. Atong naobserbaran nga hapsay ang maong pasilidad sa pagbahin-bahin sa mga basura ngadto sa mga malata ug di malata.

Matod pa ni Mayor Chiong, wa maglabad ang iyang ulo sa basura, di sama sa nahitabo sa Syudad sa Sugbo ug sa Syudad sa Mandaue, kay ang pribadong kontraktor na man ang nag-ateman sa pagkolekta sa basura sa iyang syudad ug sa pagproseso niini diha sa MRF aron magamit pa.

Duna nay pribadong grupo nga maniguro sa pagkolekta sa basura sa syudad, duna pa gyuy bahin ang lokal nga kagamhanan sa kita sa maong basura. Mobayad na man gani ang Lungsod sa Minglanilla sa paghipos sa ilang basura ug ngadto ilabay sa MRF sa Syudad sa Naga.

Sukwahi sa sistema sa ubang mga local government unit nga ang kagamhanan maoy maggasto sa mga basurero ug kon asa kini ilabay, ang mga opisyal sa Syudad sa Naga igo na lang magsusi sa trabaho nga gibuhat sa pribadong kontraktor.

Kon atong tan-awon pag maayo ang maong sistema, atong masuta nga negusyo sa pribadong kontraktor ang basura. Ang mga malata himuong compost ug biogas. Busa mahimo kining fertilizer ug gas para pangluto. Ang mga botelya ug plastic nga container, malimpyohan ug mabaligya. Ang mga residual waste, gihimo sab nga alternative fuel.

Gani, sa pagkakaron, ang maong pasilidad nag-supply na og lima ngadto sa napulo ka metric tons nga alternative fuel ngadto sa CEMEX matag adlaw. Atong nasayran sab nga sa pagkakaron, ang Kepco SPC Power Plant nagtuon sa posibilidad nga mogamit sa alternative fuel nga gikan sa maong MRF. Pinaagi niini, ang basura makatabang pa gyud sa pagpakunhod sa kadaghanon sa karbon nga gamiton sa mga coal-fired power plants.

Matod pa sa mga engineer nga didto sa maong kalihokan sa Naga, nagkinahanglan nga himuong pellets ang residual waste ginamit ang usa ka espesyal nga ekipo ug kini ang maoy gamiton sa planta.

Nagkinahanglan sab og mga kausaban ang firing sa planta. Hinuon, niingon ang atong nahinabi nga engineer nga ang KSPC naa pa sa ang-ang nga magtuon sa chemical composition sa giingong altenative fuel aron masayran kon mahimo ba gyud kini nga maoy ilawog sa planta.

Sa pagkakaron, di pa sab gyud igo ang kapasidad sa MRF sa Naga kon KSPC na ang hisgutan. Gani, kulang pa man karon ang kapasidad niini alang sa panginahanglan sa planta sa CEMEX.

Apan kinsa ang nahibawo kon modako na kining maong MRF?