NING miaging duha ka mga semana, dihang gisugdan sa pagpatuman ang segregation policy sa siyudad sa Sugbo, nagkatag ug nalangay ang pagkuha sa basura.

Hot topic ang mga basura daplin sa mga karsada.

Ang makapahimangod kaayo mao nga dunay usa ka higayon nga nakaplagan uban sa mga basura ang usa ka puya nga klaro kaayong gipa-abort sa inahan niini.

Di ni unang hitabo kay daghan na sa mga kaso sa abortion diin ang mga puya nga gipang-abort gilabay intawon sa mga basurahan.

Ingon na gyud diay niana ka ubos ang pagtan-aw sa pipila ka mga tawo sa bili sa kinabuhi ning kalibutan, diin ang naghari mao ang materyalismo.

Tungod sa kaubos sa pagtan-aw, giisip na lang gani kini nga basura kay gawas nga gipalaglag gikan sa sabakan, gilabay lang sab nga ingon sa basura.

Ingon pa sa batikan nga magsusulat nga si Kahlil Gibran, “mga ginikanan, ang inyong anak, di ninyo anak.”Kini tungod kay iya kini sa Diyos.

Busa, ang Diyos maoy magbuot kon kanus-a kuhaa dinhi sa kalibutan ang kinabuhing hinuwaman lang.

Tinuod gikan sa taguangkan sa babaye ang gisabak, apan wa magagikan kaniya ang kinabuhi tungod kay ang Diyos ang nagbuhat ug naghatag niini.

Kon ang basura ginama sa tawo, ang kinabuhi Iya sa Diyos.

Busa way bisan usa ka tawo ang dunay katungod sa pagkutlo niini. Ang puya nga naa sa taguangkan di intawon basura.