NALUKOTLUKOT ug namatay ang 73 nga ginang nga nagbiseklita nga biktima sa hit-and-run sa wa mailhing driver sa usa ka sports utility vehicle (SUV) dihang padung motambong sa dawn rosary kagahapon sa kadlawon sa Barangay Tayud, lungsod sa Liloan, Sugbo.

Si Gloria Aguinod, nagpuyo sa nahisgutang lugar, namatay diha-diha human makaangkog grabing kadaot sa iyang kalawasan ingon man ulo tungod sa kakusog sa impact sa pagkabangga.

Si PO2 Teogenes Flores Jr., imbestigador sa Lilo-an police, nagkanayon nga ang biktima nagsakay sa iyang bisiklita dihang gikasugat ang SUV ug kalit lang gibanggaan.

Human sa pagkabangga, dali kaayong nisibat ang driver paingon sa norte nga bahin sa lalawigan sa Sugbo ug wa makuha sa mga saksi ang plate number niini ingon man brand sa sakyanan.

Si Flores niingon nga ang biktima nagsakay sa iyang BMX nga biseklita samtang dunay mga kauban niini sa dawn rosary nga nag-una sa paglakaw.

Nadunggan sa iyang kauban ang kusog nga lugapak.

Gipahibawo na lang sila sa usa ka habal-habal driver nga ang biktima nadasmagan sa usa

ka sakyanan nga dali kaayong nisibat palayo sa lugar.

Tungod sa kakusog sa impact, nalabay pa ang biktima sa gilay-on nga 10 metros diha sa daplin sa dalan hinungdan nga maayong pagkalukotlukot niini ug nabali ang tuong paa.

Giingong ang biktima, bisan sa iyang pangedaron, lagsik pa hinungdan nga kanunay magsakay sa iyang BMX nga biseklita kon mopaingon pa ngadto sa balay nga ilang kuhaan ingon man hatdan sa birhen atol sa ilang dawn rosary.