FILIPINO-American nga hubog nag-tripping, iyang gidauban ang ilang balay ug nagsayawsayaw pa sulod sa balay samtang nag-ulbo ang kayo sa miaging gabii sa Barangay Duangan, lungsud sa Pinamungajan, Sugbo.
Nabalhog sa Pinamungajan police station si Charlie Brown, 31, minyo, way trabaho, human mi-angkong iyang gisunog ang ilang balay nga ginama sa kongreto nga nidanyos og P100,000.
Si PO2 Salvador Samillano, imbestigador sa Pinamungajan police nga nahinabi sa Sun.Star Superbalita, nagkanayon nga ang asawa sa suspek nga si Lolita maoy ni-report sa insidente.
Matod niya nga siya nanglawog sa ilang mga binuhing hayupan dihang gipahibawo na lang sa iyang mga silingan niadtong Biyernes sa hapon nga naugdaw ang ilang balay human masunog.
Ang bana naluwas sa tinong kamatayon dihang nakit-an sa ilang silingan nga ginganlan og Sonny, habal-habal driver, kinsa maoy nakakita sa pag-ulbo sa kayo sa ilang balay.
Dihang iyang giduol ang balay, iyang nakit-an si Charlie sa sulod nga nagsigig sayawsayaw daw wa panumbalinga nga niulbo ang kayo sa ilang balay.
Gani nakit-an pa niini nga nipunit og plastic nga lingkuranan nga giitsa sa nagdilaab nga kayo.
Nunut niini, si Sonny napugos sa pagsikad sa main door sa balay aron maabli sanglit gisirad-an sa suspek.
Dihang didto na siya sa sulod, iyang gibunlot ang suspek ug gidala sa gawas sa balay.
“Nagsayawsayaw didto sa sulod sa balay. Nagsinggitsinggit siya sa kayo nga ‘party!
Party!’ Maorag walay nahitabo. Wala manumbaling ang kayo kay pwerte pagkatama. Siga kaayog mata,” dugang pa ni Samillano.
Dihang gidala sa police station, ang suspek nipadayag nga iyang nabuhat ang pagsunog sa ilang balay tungod sa iyang kahiubos sa iyang inahan ug amahan nga wa na mopakita kaniya ug di na mopauli dinhi sa Pilippinas kay permanente na sa Amerika.
Nasuta sa imbestigasyon nga makatulo na ka mga higayon nga gipetisyunan si Charlie sa iyang mga ginikanan, apan wa gyud kini mosanong nga molarga sa Amerika tungod kay gusto niining magpabilin sa Pilipinas.
Ang inahan niini gusto unta nga isip kinamanghuran molarga usab siya sa Amerika uban sa iyang mga igsuon.
Dugang nakuhang impormasyon sa kapulisan nga ang suspek giingong tiggamitan sa ilegal nga drugas hinungdan nga dihang nakagamit, gi-trippingan ang ilang balay sa pagsunog.
Ang suspek giingong magdawatan na lang og allowance gikan sa iyang mga ginikanan ug igsuon sa Amerika ug maoy gibinlan sa iyang mga kabtangan diha sa ilang ilang lugar.
Nagpaabot pa hinuon sila sa kapulisan sa pormal nga pagsang-at og kasong arson sa asawa niini sanglit nagpaabot pa usab sila sa feedback sa mga ginikanan ni Brown didto sa Amerika.
Atol sa insedenti ang duha ka mga kamot sa suspek napaso gyud sa kayo sanglit nagsigi lang kini og wara-wara bisan pa man sa kakusog sa kayo.
Maayo na lang gani kay dunay mga silingan nga nagpakabana.