USA ka operator og de pasaherong sakyanan nagpa-blotter sa kapolisan aron pagreklamo batok sa duha ka gituohang mga fixer sa Land Transportation Franchising and Regulatory Board (LTFRB).
Gibana-bana nga moabot og kapin sa P100,000 ang nakuha gikan sa biktima.
Ang nisumbong sa kapulisan mao si Eve Agapay, 46, taga Rabaya st., siyudad sa Talisay.
Iyang gitumbok sila si Marife Abastas, taga Jagobiao, Mandaue city ug Liza Bobo, taga Compostela.
Matod ni Agapay, kinsa nisumbong ngadto kang SPO4 Riolito Jacalan sa Mabolo police, nga niadto siya sa buhatan sa LTFRB aron sa pagkuha og franchise sa sakyanan.
Iyang nahimamat ang duha ug tungod sa pasalig, nituo siya ug nakigsabot nga maoy mohikay sa franchise sa pampublikong sakyanan.
Nisita og salapi ang duha ka mga suspek ug nihatag siya sa kantidad nga gipangayo.
Apan gisigihan siya og pabalik-balik samtang nagsigi og pangayo og salapi, hangtud nga ang tanan mikantidad og kapin sa P100,000.