DUHA ka mga tawo nga gituohang maoy nanulis sa usa ka salesman sa softdrinks sayo ning semanaha, ningtulis na sab sa laing ahente sa softdrinks.
Tag-iyag tindahan sa mga motorsiko gilakip sa pagtulis kagahapon sa ala 1 sa hapon sa Barangay Lahug, dakbayan sa Sugbo.
Kapin sa P30,000 ingon man mga butang nadala sa duha ka mga tulisan nga nagsakay sa kolor itom nga motorsiklo, pulos nagsul-ob sa itom nga helmet ug jacket nga nagdalag armas nga kalibre .45 nga pistola.
Si PO3 Celso Seville, imbestigador sa Theft and Robbery Section (TRS) sa Cebu City Police Office (CCPO), niila sa biktima nga si Ponciano Macalinao, 35, minyo, taga B. Rodriguez, Barangay Sambag II, dakbayan sa Sugbo, salesman sa softdrinks ug ilimnon nga gipanag-iya sa Sydney Trucking.
Matod pa ni Seville nga si Macalinao busy sa paghan-ay sa mga botelya ibabaw sa sakyanan samtang iyang igsuong truck boy naghakot sa gi-deliver sa nahisgutang lugar.
Kalit nga niabot ang duha ka mga tulisan ug ni-parking sa atubangan sa ilang sakyanan.
Usa niini nangutana kaniya kon tag pila ang Sparkle nga softdrinks.
Apan iyang nabantayan nga sa panahon nga siya niirog sa pikas nga habig sa ibabaw sa iyang sakyanan, kadudahan kaayo kinig lihok hinungdan nga siya niambak ug nidagan.
Tungod sa iyang karatol, didto siya nisulod sa tindahan og motorsiklo ug mga pisa nga Jurevs Trading nga gipanag-iya ni Jackson Adarna, 31, taga Barangay Suba.
Apan gisundan siya sa duha ka mga tulisan ug ningsulod pa sa tindahan.
Nakuha sa mga tulisan ang kapin sa P10,000 nga halin sa softdrinks, apan ang mga tulisan ningkuha pag-apil sa Chinese gold nga kwentas ni Adarna nga mokantidad sa P20,000 ug P2,000 nga kantidad sa MP4.
Si Ervic Bariguit, 25, mekaniko sa Jurev, niingon nga kalit nga nidagan ang salesman ug nisulod sa ilang tindahan dayon nipadayag nga NBI hinungdan nga sila nakalitan.
Duha ka mga lalake ang ning-abot nga nagdalag kalibre .45 nga pistola ang ningsunod dayon ning demanda sa beltbag sa salesman samtang ang kauban niini ningtion kanilag armas ug ningpadayag nga di sila palangason kay wa silay labot.
Apan dihang ningsibat na, giapil sa pagdala ang alahas sa ilang amo ug ang MP4.
Wa sila makahimo sa pagsukol sanglit ang mga suspek nakation na nila, samtang wa usab sila makalihok dihang si Macalinao nidagan ug kalit nga nipailang NBI.
“Nagtuo man mi nga snatcher to siya nga gigukod unya NBI ang naabot! Mga tulisan man diay to. Kon nisukol pa mi ato, duna gyoy mangamatay namo,” dugang ni Bariguit.
Si Seville niingon nga kini maoy ikatulong higayon karong buwana nga mga ahente sa softdrinks ang gipangtulis.
Una niini diha sa may JY ug ikaduha sa may Sitio Baka, Barangay Apas.
Nagtuo ang mga imbestigador sa TRS nga ang mga tulisan usa ka grupo base sa estilo ug description nga duha mag-angkasay sa motorsiklo nga magsulo-ob sa itom nga jacket ug helmet.