DUHA ka mga semana nga makasinati og scheduled brownout ang dakbayan sa Cagayan de Oro ug tibuok pulo sa Mindanao.

Sigun kini sa gibutyat ni Director Raul L. Alkuino, sa First Bukidnon Electric Cooperative (Fibeco) sa dakbayan sa Valencia sa Bukidnon.

"Naay shortage sa kuryenti that will affect the entire Mindanao kay i-shutdown ang Pulangi IV tungod sa leakage," matod ni Alkuino atol sa press conference niadtong Biyernes ning siyudad.

Ang impormasiyon gipahibalo sa Department of Energy dili pa lang dugay diin gipasabot sa maong buhatan nga i-dewater nila ang Chananel Canal aron ayohon ang leakage.

Gani duna nay pagkapalong sa kuryenti nga nasinati ang dakbayan diin sa inisyal nga impormasiyon unom ka oras ang scheduled brownout sa Cagayan Electric Power and Light Company (Cepalco).

Ang brownout gitumong atol sa Semana Santa sa rason nga daghang mga establisimento ang manirado ug dili maapektuhan ang dagan sa negosyo.

Sa susamang higayon, gipadayag sa mga opisyales sa Fibeco ang ilang pagsuporta sa katukuran sa Pulangi V nga gilaumang sulbad aron mokunhod ang posible nga pagsaka sa bayronon sa kuryenti sa umaabot duha ka tuig.

"We in Fibeco support the Pulangi V as one way to lower power rate cost and to attract investors because of its cheaper power rate," padayag ni Alkuino. (Annabelle L. Ricalde)