APIL sa nalatayan sa motorsiklo ang kinatawo sa usa ka lalaki samtang nagbaklay kini sa kalsada niadtong Sabado mga alas 5:00 sa hapon sa Sta. Ana, lungsod sa Tagoloan, Misamis Oriental.
Giila ang biktima nga mao si Felix Pustanio, hingkod and edad, ulitawo, lumad nga taga siyudad sa Butuan ug kasamtangan nga nagpuyo sa lungsod sa Tagoloan.
Nasayran nga nagbaklay lamang ang biktima daplin sa dalan dihang kalit lang nga gibanggaan sa usa ka motorsiklo nga wala makuha ang plate number ug misibat.
Nalatayan ang tibuok lawas niini ug naapil ang kinatawo sa biktima.
Gibiyaan sa motorsiklo nga nagbuy-od ang biktima ug gidala sa Tagoloan Police Station sa balay tambalanan dihang ilang naresponde ang hitabo.
Giobserbahan pa sa mga doktor sa Northern Mindanao Medical Center (NMMC) ang biktima tungod sa grabeng naangkon niini.
Giila na usab sa kapolisan ang motorsiklong mibangga niini.
Sa laing bahin, laing lalaki ang natamakan ang tiil human nalatayan sa Isuzu truck niadtong Sabado mga alas 6:00 sa gabii sa lungsod sa Villanueva, Misamis Oriental.
Giila ang biktima nga mao si Raymund Fernando, 26, ulitawo, taga Puerto ning siyudad.
Gibutyag sa paryente sa biktima nga nagbisita lamang kini sa iyang mga ig-agaw apan dihang mitabok nabanggaan ug nalatayan ang tiil niini hinungdan sa pagkabali.
Gidala gihapon ang biktima sa NMMC nga padayon pang giobserbahan sa mga doktor. (Stephanie V. Berganio)