GIPA-ABLIHAN na ni Gobernador Gwen Garcia ang 15-metros nga Larsian road niadtong miaging Martes.

Mahimo nga kining simbolo sa pagkahibalik sa maayong relasyon sa syudad ug probinsya sa Sugbo.

Usa ka dakong hinungdan sa mga dagkong pahiyom ni Gov. Gwen ug ni Mayor Mike Rama.

***

Gisirad-an sa Kapitolyo ang Larsian road niadtong 2007.

Takuwahaw lang nga nawagtang ang usa ka popular kaayo nga kan-an sa lamiang barbecue dinhi sa Sugbo.

Nabalhin kini ngadto sa usa ka luna sa probinsya didto sa duol sa dalan B. Rodriguez.

Nanganak pa gyud ang Larsian kay duna nay Larsian sa dakbayan sa Mandaue ug sa lungsod sa Consolacion.

Kon tak-opan ang usa, managhan diay.

***

Unsa bay hinungdan sa pagkasira sa Larsian road?

Naamong lang kini sa panagbangi tali ni Gov. Gwen ug ni kanhi mayor ug karon Kongresista Tomas Osmena tungod sa giingong laraw sa Kapitolyo sa paghingilin sa mokabat sa 5,000 ka mga pamilya nga nagpuyo sa mga luna sa yuta sa probinsya dinhi sa syudad sa Sugbo.

Bawos-bawos ang duha. Gisirad-an ang Larsian road ug gibabagan ang P1.5-bilyunes nga Ciudad project sa Kapitolyo.

***

“Let this opening of Larsian road be a mere symbolic manifestation of the many roads to open between Cebu and the City of Cebu,” matod pa ni Gov. Gwen sa dihang gitangtang nila ang ali sa Larsian Road uban ni Mayor Mike Rama.

Matangtang sab kaha ang ali sa Ciudad project?

Atong kahinumduman nga ang nag-ali sa Ciudad project usa ka ordinasa sa konseho sa syudad sa Sugbo.

Anhi na dinhi makita ang katag kon kinsay nagkontrolar sa konseho.

***

Anhi na sab dinhi makita kon dunay bay motoo sa mayor sa konseho sa syudad.

Nindot unta ang panaghiusa sa City Hall ug sa Kapitolyo.

Ginaingon nga daghan ang mahimo pinaagi sa panaghiusa.

Mga dala nga gisirad-an mahimong ablihan, mga proyektong gibabagan mahimong ipadayon.