SAKOP sa Crips Gang gipusil patay sa grupo sa karibal nilang gang ang Bloods, didto sa dakbayan sa Mandaue.

Nahitabo ang pagpamusil sa may dalan D. Suico, Barangay Tabok, pasado alas 12:00 sa tungang gabii niadtong Sabado.

Samtang duna say laing gipusil didto sa dakbayan sa Lapu-Lapu nga gikan nitambong og disco.

Ang namatay nga sakop sa Crips gang giila nga si Jemmar Obsequias, 18, ulitawo ug taga Upper Tabok.

Samtang ang mga responsabli giingong mga sakop sa Bloods nga karibal sa gang sa biktima.

Base sa pasiunang imbestigasyon sa kapulisan, ang biktima naglakaw lang paingon na pauli sa ilang balay uban sa iyang mga barkada.

Sa dihang ilang nasugatan ang grupo sa mga sakop sa Bloods,giingong gilabay silag botelya.

Nidagan ang biktima kauban sa iyang mga higala apan gisundan kinig tulo ka sunodsunod nga buto sa wala pa matino nga kalibre sa pistola.

Ang biktima naigo sa iyang buko-buko nga niresulta sa dihadiha nga kamatayon.

Si PO1 Edgar Balimbing nga nahinabi sa Sun.Star Superbalita niingon nga ang mga gikatahapan daling nisibat sakay sa usa ka multicab palayo sa dapit ug wala nay naabtan ang kapulisan nga nirespondi sa alarma.

Samtang patay sab ang usa ka batan-ong lalake human gipusil samtang gikan nitambong og disco didto sa dakbayan sa Lapu-Lapu.

Ang biktima giila sa kapulisan nga si Johnfren Igot, 17, ulitawo ug taga Barangay Soong.

Si SPO3 Jesus Jimenea nga nahinabi sa Sun.Star Superbalita nibutyag nga ang biktima uban sa iyang mga higala gikan nitambong og disco ug paingon na nga mopauli pasado alas 4:00 kagahapon sa kaadlawon.

Usa ka ginganlag Romy Dela Cerna, 25, minyo ug taga Barangay Maribago nga giingong nakainom niadtong higayona kilid sa karsada, ang nipusil sa biktima gamit ang wa pa matino nga kalibre sa pistola.

Ang biktima naigo sa iyang ulo, namatay dihadiha ug wa na madala sa tambalanan.

Ang mga sakop sa Homicide Section nga nirespondi sa alarma wala na makasikop sa gikatahapan tungod kay nakasibat na.

Nagtuo ang kapulisan sa Lapu-Lapu nga paregla maoy motibo sa krimen.