ANDAM na ang Simbahang Katoliko sa Sugbo alang sa himuong Siete Palabras o katapusang pitong ka mga pulong sa Ginuo sa wala pa mamatay sa Cebu Metropolitan Cathedral sa adlawng Biyernes Santo nga sugdan alas 12 sa udto.
Matod ni Msgr. Achilles Dakay, tigpamaba sa Artdyosesis sa Sugbo nga ang Siete Palabras mag-sentro sa pito ka mga decrees sa Simbahang Katoliko nga natuki atol sa Second Plenary Council of the Philippines nga gipahigayon sa Manila niadtong tuig 1991.
Kini naglakip sa pastoral orientation, pamilya, kababayen-an, kabatan-onan, migrant workers, katesesis ug lay evangelization.
Si Dakay sa pakighinabi sa Sun.Star Superbalita kagahapon nagkanayon nga ang pito ka mga decrees nagpresentar sa nagkadaiyang mga sektor nga gipasibo sa mga pulong sa Ginuo sa bibliya ug unsay mabuhat sa mga layko alang niini.
Karong tuiga, ang tema mao ang “Siete Palabras ni Jesucristo nga mao gihapon kagahapon, karon ug sa walay katapusan”.
Si Cebu Archbishop Emeritus Ricardo Cardinal Vidal maoy pasiuna nga mopaambit ug moesplikar kun nganong gibuhat ang Siete Palabras.
Ang Auxiliary Bishop sa Sugbo nga si Julito Cortes maoy mopasabot sa unang pulong, “Amahan pasayloa sila, kay wa sila masayod sa ilang gibuhat”.