BISAN nagpadayon ang pagpananum og landmine ang mga rebeldeng New People's Army (NPA), wa nalisang ang mga sakop sa 39th Infantry Battalion (IB) nga maigo sa landmine sa ilang pagserbisyo sa kabarangayan sa Sta. Cruz, Davao del Sur.
Si Lieutenant Raul Villegas, Civil Military Operations (CMO) officer sa 39th IB, nagsulti sa Sun.Star Superbalita nga gigahin nila ang usa ka adlaw alang sa pag-serbisyo sa katawhan pinaagi sa medical, surgical ug dental mission nga gihimo kagahapon sa covered court didto sa Barangay Zone 1, Barangay Sta. Cruz.
Ang maong opisyal nagpasalamat sa tabang nga gitunol kanila sa Davao Medical School Foundation Batch 1994, lokal nga kagamhanan ug negusyante sa Sta. Cruz.
Gisulti ni Villegas nga 35 ka mga doktor ang miabot sa maong lugar nga maoy naghiling sa mga pasyente nga buot makapahimulos sa serbisyong medikal nga gipasiugdahan sa militar.
Si Villegas nagbutyag nga malipayon kaayo ang katawhan nga natabangan pinaagi sa libreng tuli, pagtanggal sa bukol, psychiatric consultation, stress debriefing, pre-natal care, papsmear, ob-gyne consultation, internal medicine consultation, Pedia consultation, ECG and FBS ug cholesterol screening.
Gilantaw sa mga sakop sa 39th IB nga ang maong medical mission maoy labing dako nga kalihukan nga ilang nahimo karong tuiga.
Suma ni Villegas nga bisan dunay hulga sa pagtanom og landmine magpadayon gihapon silang maghatud sa ilang community outreach program.
Giingon nila nga wa sila natarog sa mga paningkamot sa mga NPA nga mabalda ang ilang pagtunol og tabang medikal sa katawhan sa ilang area of responsibility. (Orlando B. Dinoy)