USA ka construction worker ang gipusil sa wa mailhing lalaki kinsa misud sa ilang balay alas 2:30 sa kaadlawon kagahapon didto sa Barangay Bago Gallera, siyudad sa Davao.

Ang biktima mao si Glenn Montefalcon, 33, minyo, nagpuyo sa Bihonan, Libby Road, Barangay Bago Gallera.

Si Police Officer 3 Dominador Vitor, duty investigator sa Talomo Police Station, nagbutyag sa iyang spot report nga sa wa pa mahitabo ang pagpamusil, gibato sa wa mailhing lalaki ang balay sa biktima.

Nasayran nga natulog ang biktima niadtong higayona, apan nahigmata siya dihang gibato ang atop sa ilang balay mao nga iyang gisusi apan dihang migawas na ang biktima, gipusil siya duha ka higayon.

Ang biktima naigo sa iyang tuong paa ug tuong hawak mao nga miambak siya gikan sa ilang beranda ug mitago sa luyong bahin sa ilang balay.

Giingon nga gisundan ang biktima sa tawo nga buot mopatay kaniya apan naluwas siya sanglit nakahimo siya pagtago sa ilang balay.

Si Montefalcon daling gidala sa Southern Philippines Medical Center (SPMC) aron patambalan ang iyang samad nga naangkon.

Nakuha sa kapulisan gikan sa nahitaboan sa krimen ang duha ka slug sa bala sa wa matino nga kalibre sa armas nga gigamit sa pagpusil sa biktima.

Ang kapulisan sa Talomo Police Station naningkamot karon masayrana ng motibo, mailhan ug masikop ang suspek aron pasakaan og kaso sa korte. (Alger Dura)