HUGOT na ang pagbantay sa kapulisan sa tibuok probinsiya sa Davao del Sur alang sa kasaulogan sa Kuwaresma.

Sa dakbayan sa Digos, gimando ni Superintendent Hubert Abadia, city police director, ang pagbantay sa overland transport terminal human nidagsa ang mga tawong mopauli sa kaprobinsiyahan dinhi sa Mindanao.

Gihimo sab sa kapulisan ang subsob nga inspeksiyon sa tanang mga bagahe sa mga pasahero sa mga terminal aron nga maseguro ang ilang kaluwasan.

Lakip nga gipakatap ang mga patrol cars sa kapulisan sa kadalanan subay sab sa mando ni Abadia.

Nagpagawas sab og direktiba ang Davao del Sur Provincial Police Office (DDSPPO) ngadto sa tanang hepe sa kapulisan nga bantayan ang mga simbahan nga mohimo og nagkadaiyang aktibidades sa paghandom sa mahal nga adlaw.

Si Senior Superintendent Ronald dela Rosa, provincial police director, nitataw nga magmuntar sila og police assistance center ug hotline aron matabangan ang mga motoristang mobiyahe.

Nagpahinumdom ang kapulisan ngadto sa mga drayber nga susihon ang ilang mga sakyanan una mobiyahe aron nga di makasinati og mga aberiya.

Dason ni dela Rosa, di lang mga katingad-ang bagahe ang angayang susihon apan apil na ang mga tawong mapahimuslanon sa higayon sama sa mga kawatan, karnaper ug uban pang dautang elemento. (Dondon Dinoy)