GISUSI na sa kapulisan ang patayng lawas sa usa ka lalaki nga napalgan nga dunay mga samad dinunggaban sa lawas didto sa Sityo Barobo, Barangay Poblacion, Laak, Comval Province, Sabado sa buntag.

Kapulisan nag-ila sa biktima nga si Eduardo Borres, 49, molupyo sa nahisgutang nga lugar.

Sumala pa sa taho gikan Comval Province Police Provincial Office nga nakit-an ang patayng lawas ni Borres banda alas 7:00 sa buntag nga nagbuy-od na nga way kinabuhi duol sa balay sa iyang agalon nga si Boy Melloria.

Ang biktima dunay daghang samad dinunggaban sa kalawasan nga maoy gituohang hinungdan sa iyang hinanali nga kamatayon.

Narekober sa mga mirespondeng sakop sa kapulisan ang usa ka kutsilyo nga dunay gitas-on nga napulo ka pulgada nga maoy gigamit sa mamumuno.

Sa inisyal nga pakisusi sa kapulisan, nasuta nga nagtugway lamang sa iyang kabaw ang biktima sa dihang gidunggab siya sa suspek.

Gilusad na ang manhunt operation sa kapulisan aron nga madakpan ang suspek. (Marvin Pineda)