USA ka babaye gitulis sa wa mailhing mga suspetsado nga nakasakay og motor didto sa Barangay Magugpo North, siyudad sa Tagum Dominggo sa gabii.

Nailhan ang biktima nga mao si Hazyllene Adialla, 24, nagpuyo sa Barangay Magugpo North, siyudad sa Tagum.

Nasayran gikan sa Tagum City Police Station nga nahitabo ang insidente pasado alas 8:00 sa gabii samtang naghulat og masakyang pedikab si Adialla.

Sumala pa nga kalit lamang nga miabot ang duha ka wa mailhing mga lalaking sakay sa usa ka motorsiklo nga way plate number.

Gitionan og kutsilyo ang biktima sa mga suspek dayon sa pagdeklara og hold-up.

Sa kahadlok, wa nay nahimo ang biktima ug napugos siya sa pagtugyan sa iyang bag nga dunay sulod nga kuwarta nga balor og P3 mil, tulo ka mga credit card ug usa ka yunit nga Samsung nga cell phone nga nagkatidad og kapin P30 mil.

Human makuha ang tuyo, mga suspek dayong misibat padulong sa wa matino nga lugar sakay sa ilang get-away nga motor.

Biktima midangop na lamang ngadto sa buhatan sa kapulisan aron nga matala ang iyang gidangatan sa mga tulisan. (Marvin Pineda)