TUNGOD sa nagkawala nga tradisyon sa prosisyon, ubang pang relihiyuso nga kalihukan, ang lokal nga kagamhanan sa siyudad naningkamot karon nga kini mabuhi og usab.

Si James Zimmerman nagbutyag nga pamaagi nila, kini aron sab matabangan ang Simbahang Katoliko nga mapasabot ngadto sa katawhan nga di wad-on ang maong tradisyon nga kabahin na sa kultura natong mga Pinoy.

"We want to bring back the tradition kay sa tan-aw nato nagka-wala na gyud ang pag-practice sa prosisyon, mga naandan nato nga kultura, kadaghanan na lang ang gihuna-huna kay magkiat-kiat," ni Zimmerman sa Kapehan sa Dabaw, kagahapon.

Nasayran nga sa sugyot sa grupo ni Zimmerman ngadto sa local government, plano nila nga himuon ang kalihukan Mayo 21-23, apan ang tanan di pa tino tungod padayon pang gina-plantsa ang tanang kalihukan.

"We want to revive the Marian procession, yung Santacruzan and we will do it according talaga sa tradition. Aside nga it draws visitors, educational sab siya alang sa mga taga-Davao nga mag-witness sa event," dugang sa opisyal.

Ang bulan sa Mayo, subay sa relihiyosong kalihukan sa Katoliko, kini nga bulan gitanyag ngadto kang Birheng Maria.

Luyo sa prusisyon, highlight sab sa aktibidad ang kompetisyon sa Santacruzan.

"We already asked the help ng San Pedro Church for this, Bishop Capalla. Naa na say initial talk, looking forward nga mahan-ay na siya tanan pag-abot sa panahon," ni Zimmerman.

Ang Santacruzan himuon nga dalan aron ang mga lokal nga designers dinhi makapakita sab sa ilang abilidad sa pag-desinyo, pagpasuot sa ilang ginama nga gowns ngadto sa mga babayeng mosalmot sa Santacruzan.

Ni Zimmerman sa Santacruzan, nakahan-ay ang kompetisyon sa desinyo sa gowns, sa arko nga gamiton, lakip na ang modelo.

"Siyempre, every character nga apil is i-explain aron sab mailhan sila and unsa ang ilang significance."

Ang paningkamot sa local government sa Davao labot pagbuhi og usab sa prusisyon ug Santacruzan nga kabahin na sa kulturang Pinoy, pipila lamang sa kalihukan nga ilang giandam subay sa pipila ka bulan nga 1st Summerfest Davao Festival.

Nauna ng giklaro ni Zimmerman nga ang Summerfest Festival di lamang paugnat sa kusog, apan kini kumbinasyon sa nagkadaiyang aspeto, sama sa isports, cultural, musika, ug uban pa.

Ang Summerfest festival gimugna aron kahatagan og dalan nga ma-market ang siyudad sa Davao ngadto sa mas daghang bisita gikan bulan sa Marso-Mayo diin wala kaayoy dagkong kalihukan ang dakbayan. (Rhona Goc-ong)