GIPAHIBALO ni Cagayan de Oro Congressman Benjamin Benaldo nga anaa sa maayong kahimtang ang pinay nga taga siyudad sa Cagayan de nga nasikop dihang nasapon nagbitbit og ilegal nga druga.

Sa interbyu sa usa ka sibyaan sa radyo ngadto kang Benaldo kinsa anaa pa sa kasamtangan sa nasod sa Brazil, nibutyag nga iya na nga naestorya sulod sa prisuhan si Analyn D. Abalde kinsa gilauman nga maubosan ang sintensya human desidido sa pakig-coordinate sa kapolisan sa dapit kalabot drug syndicate nga nangbiktima niini.

Maayo usab ang kahimtang niini sulod sa prisuhan ug gihatagan sa iyang panginahanglanon. Dili angay nga mabalaka ang mga ginikanan niini tungod kay nakig-coordinate si Abalde sa mga polis.

Gibutyag ni Benaldo nga personal niyang nahinabi si Abalde ug gipasalamatan niini ang iyang presensya gani niabot pa kini og tabang sa biktima.

Daghan sa mga personahe sa Brazil ang gihinabi ni Benaldo aron magprotehir sa kaso niini.

Samtang usa ka Edna nga taga-siyudad gihapon giingong biktima usab sa illegal nga recruiter ug gibyaan lamang sa South Paulo City, sa maong nasod ang natabangan og apil ni Benaldo human naglisod na kini sa pagbuhi sa kaugalingon niini human walay masudlan nga trabaho. Nipaabot sa iyang tabang si Benaldo ngadto kang Edna.

"Akong nasayran nga dili lang sila duha ang anaa didto, naa pud usa ka taga-lungsod sa Tagoloan ang biktima gihapon niini ug akong paninguhaon nga apil sa matabangan," ni Benaldo.

Gani ang papeles ni Edna gihikay na aron maayo kining makabalik ning siyudad.

Kahinumuduman nga nasikop si Abalde, 32, taga-Barangay Pagatpat sa Brazil human ang recruiter niini nagbilin og mga bagahe kang del Puerto ug ipasunod na lamang kini sa nasod sa Thailand diin giingon sa maong recruiter nga kasamtangan pang gihimo ang working visa niini.

Migawas si Abalde pinaagi sa tourist visa nga gigamit niini.

Giingong gisaaran kini ni Alma ang recruiter nga taga RER Kauswagan nga atimanon ang iyang working visa aron mahimong factory worker sa Thailand, apan dihang paghidangat sa nasod sa Brazil gibiyaan og gibilin ang bagahe niini ug giingong ipaapas lamang sa Thailand.

Pag-abot sa airport sa Brazil, nasikop si Abalde kinsa detinado karon didto human nakuha gikan sa bagahe nga gibitbit ang ilegal nga druga. (Stephanie V. Berganio)