DEAD on arrival sa balay tambalanan ang usa ka lalaki human gisukmag sa bayaw niini niadtong Domingo mga alas 9:20 sa gabii sa Barangay 35, ning siyudad sa Cagayan de Oro.
Giila ang biktima nga mao si Samuel Sapa, 52, minyo, residente sa susamang dapit.
Gitumbok nga suspetsado ang bayaw niining giilang si Wuarlo Soner, hingkod ang edad, minyo, sa susamang dapit.
Si Police Inspector Dominador Orate sa Police Station 2 sa Cogon (PS2) nahinabi sa Sun.Star Superbalita nga miuli sa puloy-anan nga hubog si Sapa apan nabikil kini sa estorya gikan kang Soner nga miresulta pagsukmag niini sa nawong sa biktima.
Misarasay kini ug maayong pagkabunal niini sa ulo nga maoy hinungdan sa iyang hinanaling kamatayon.
Gibutyag ni Orate nga blagnko pa sila kung unsay hinungdan sa giawayan sa duha nga misangpot sa maong hitabo.
Gisikop sa mga barangay kagawad sa dapit ang suspetsado ug gi-turn over sa kapolisan sa PS2 kinsa andam nga serbisyuhan ang iyang salaod ug nagbasol ning panahona sa iyang gihimo.
Matud ni Orate nga gitambagan usab nila ang hingtungdan sa biktima nga mopasaka gyod ug sumbong niini labina nga kasamtangan wala pa pamilya ang pormal nga complainant niini. (Stephanie V. Berganio)