Abel de Leon
San Fernando, Cebu
DAW duol ra ang hawin nga buwan. Gikab-ot ni Mr. de Leon sa iyang kamot. Bugnawng hangin hinuon ang nahinol sa iyang mga tudlo. Mipahiyom siya. Nakabig lang diay siya sa katahom sa buwan. Sa sunod nga mga mga adlaw takdol na.
Nagkasabot na sila si Merle, ang iyang bag-ong hinigugma nga singer sa Rex Piano Bar, nga moanhi dinhi aron mosud-ong sa takdol nga maoy paborito niyang kagabhion sukad pa sa iyang kabatan-on hangtod nga nabiyudo na siya. Kadaghan na siya moanhi sa Mountain View Mountain Resort uban kang Miriam, iyang asawa, sa buhi pa kini inigkatakdol sa buwan. Dinhi madigo sila sa kahayag sa buwan samtang sumay-sumayon nila ang ilang mga saad. Hangtod natawo si Dodgie ang bugtong nilang anak.
Miginhawa siyag halawom. Si Dodgie misupak sa iyang gusto. Miundang sa pagtuon kay gustong mag-singer. May buluwanong tingog ang iyang anak. Apan di kini iyang pangandoy alang kang Dodgie..
“Maoy akong tuyo nga mag-doktor ka, di kanang kanta-kanta, animal ka, Dodgie!”
Apan wa niya motuo ang iyang anak. Mikuyog kini sa usa ka banda ngadto sa gawas sa nasod. Iyang gikaguol ang pagtalikod sa iyang anak. Sa sinugdanan misuwat kini kanila ug nangayo kinig pasaylo, apan wa kini magbasol nga siya nag-singer. Hangtod kalit kining nahilom ug wa na magsulat kanila.
Namatay ang iyang asawa sa sakit sa kasingkasing sa kaguol nga nahanaw na ang ilang anak. Nagtuo sad siya nga may nahitabo sa ilang anak. Busa iya kining gi-report sa embassy dinhi sa Pilipinas, apan way timailhan nga mapalgan ang iyang anak.
Nagkaila sila si Merle sa Rex Piano Bar. Buotan ug matahom kini. Apan di mouban kon dapiton niya sa gawas. Usa ka adlaw niana nagmagul-anon si Merle. Iyang nahibaw-an nga nagkinahanglan kinig dakong kantidad alang sa operasyon sa mata sa iyang igsuon. Kay nakat-on na siya sa pagmahal ni Merle iya kining gihatagan sa kantidad. Nalipay kini ug mihawok kaniya. Misugot nga mouban kaniya dinhi sa Mountain View Resort. Mao nga naghinamhinam siya sa gabii sa takdol nga buwan.
Sunod adlaw ang operasyon sa igsuon ni Merle. Misaad siya nga moadto sa hospital. Pag-abot niya sa tambalanan midiritso siya sa operating room. Lain ang gi-operahan. Sa iyang pakisusi, humana diay ang pag-opera sa igsuon ni Merle. Apan siya na-intriga sa apelyido sa igsuon ni Merle nga gitawag nga Mr. de Leon. Wa kini mo-estar sa hospital mingdritso sila si Merle pagpamauli kay misugot man ang doktor.
Gisundan karon ni Mr.de Leon ang taksi nga gisakyan ni Merle. Wa una siya mosud sa bar. Nag-atang siya sa gawas sud sa iyang awto sa may layo. Misud ang taksi sa usa ka village. Nanaog si Merle tungod sa usa ka kasarangan nga balay. Gipasip-ig niya ang awto sa labong nga tanom sa koral. May mitagbo kang Merle. Kalit siyang nalipong sa iyang nakita. Ang iyang anak nga may bindahi sa mga mata gihagkan ni Merle. Buhi ang iyang anak! Naglumpayat karon ang iyang kasingkasing.
Takdol na ang buwan. Nagtutok si Mr. de Leon sa langit nga mapahiyumon. Ang silaw sa takdol daw milapos sa iyang kasingkasing. Misamot ang iyang kalipay karon kay napalgan na niya ang iyang bugtong anak ug manununod sa iyang bahandi. Mitindog siya Manaog siya sa ubos kay iyang duawon ang iyang anak. (Katapusan)