SWERTE lang kaayo nga wala modako ang sunog sa Robinson’s diha sa Fuente Osmeña. Nakaingon ko nga swerte kay mag-unsa na man lang ang mga tawo nga tua sa taas sa Cebu Midtown Hotel.

Kay unsaon, di lang daan kining atong kabomberohan, wa pa gyuy ekipo nga makaluwas ug makapawong og kayo sa mga tag-as nga building.

Ambot, dugay na man unta kaayo kining atong syudad nga dunay mga tag-as nga building. Bata pa gud ko nga naa na kanang Diamond Tower. Sulod sa katuigan, nisunod ang ubang mga tag-as nga building labi na kining Cebu Plaza Hotel ug kanang Midtown. Unya, sa pagkakaron, naa nay Club Ultima.

Dayon, duna pa unya kitay daghan pang paabuton nga mga tag-as nga building anha unya sa South Reclamation Project (SRP).

Apan samtang dugay na nga dunay taas nga building ang Syudad sa Sugbo, ang atong mga opisyal sa dakbayan kontento na kaayo sa klase sa mga ekipo sa atong kabomberohan.

Kon buot hunahunaon hinuon, maglisod man gani ang atong mga bombero sa pagpawong og kayo sa mga urban poor area sa syudad, nganong mag-expect man kita nga andam sila sa mga klase sa sunog kon mga habog na building na ang maigo?

Pila na ka mga sunog nga nahitabo nga moingon na ang kabomberohan nga na-controlled na ang kayo kon ang mga balay nga nasunog nahurot nag kaugdaw?

Tungod niini, nakaingon gyud ko nga swerte ang nahitabo kagahapon.

Ang sunod pangutana, hangtod kanus-a man kita mag-agad sa swerte kon sunog na ang hisgutan? Kanus-a man molihok kining atong mga opisyal? Unya na kon dunay laing hitabo ug may daghang mangasunog? Kuyaw man gud kining atong mga opisyal kon ingon niining klase sa serbisyo ang hisgutan, gahi modesisyon sa unsay saktong buhaton.

Kini lang bitawng isyo sa basura, dugay na napuno ug nag-awas-awas ang basura diha sa dumpsite sa Inayawan. Apan nganong karon pa man mangita og mga alternatibo ang atong mga opisyal sa panahon nga di na mahimo ang maong dumpsite?

Atong naobserbaran nga mas humok pang mogahin og pundo ang atong mga opisyal kon kining South Reclamation Project (SRP) gastuhan. Kay ngano? Aron siguradong dunay mopinansya sa kampanya sa eleksyon?

Nagduda man gani ko nga kining pag-ateman sa basura sa Syudad sa Sugbo tungod pa kini kay magsugod na sa pagtukod ang SM ug Filinvest sa SRP. Di mahimong magtukod na kini nga baho gihapon ang Inayawan.

Balik sa mga bombero, usbon ko lang ang pangutana kon hangtod kanus-a pa mopalit og mga modernong ekipo ang atong Syudad sa Sugbo aron makaresponde pagtarong ang atong mga bomber kon mga tag-aw nga edipisyo ang masunog?

Unya na ba kita molihok kon dunay mas grabing disgrasya? O mohulat ba sila kon ang mga nagtukod karon sa SRP mao nay moreklamo nga ang ilang mga tag-as nga building way kasigurohan kon sunog na ang hisgutan.