GIKAHIBUNG sa mga opisyal sa dakbayan sa Naga ang pag-angkon sa kadagkuan sa Environmental Management Bureau (EMB) sa Department of Environment and Natural Resources (DENR)-7 nga wa sila mag monitor sa gitukod nga coal stockyard sa Kepco-Salcon Power Corp. (KSPC).

Ang pag-angkon gihimo mismo sa hepe sa environmental impact assessment division sa EMB-7 nga si William Cuñado atol sa KSPC multipartite monitoring team (MMT) meeting nga gihimo didto sa People’s Hall sa Naga City Hall.

Si Mayor Valdemar Chiong nga nakatambong sa MMT meeting nagkanayon nga angayan gyud nga monitoron ang mga planta nga gitukod tungod kay ang EMB mao man ang naghatag og environmental compliance certificate (ECC).

Atol sa MMT meeting nga si Cuñado mao sab ang chairman , nasuta nga duna gyuy duha ka violation sa ECC nga nahimo ang KSPC.

Apan gitataw ni Cuñado nga ang EMB 7 wa pa makakuha og kopya sa environmental impact assessment (EIA) study sa KSPC plants.

Gipasalig ni Cuñado nga sa mosunod nga duha ka semana ang MMT mohimo na sa regular monitoring sa coal plant.

Sa pagkakaron ang KSPC nagsugod na sa pagtaod sa bongbong nga mosira sa kinatibuk-ang coal stockyard aron di na makagawas ang abog sa higayon nga dunay i-deliver nga coal.

Ang pagtaod sa bongbong sa coalyard girekomendar human mga lumolupyo sa Barangay Colon ug kasikbit nga mga dapit ang nireklamo sa grabing itom nga abog gikan sa coal plant.

Si North Poblacion Barangay Captain Ray Manabat nga sakop sa MMT nagkanayon nga natagbaw kayo sila sa mitigating measures nga gipatuman sa KSPC.

Atol sa MMT ang KSPC nipresentar sa ilang long-term dust control plan, nga naglakip sa three-meter concrete fence ug ang seven-meter-high extension nga galvanized sheets.

Itaod usab ang fine mesh net ibabaw sa 10-meter nga koral.