LINYA sa kuryente ang gitutokan karon sa imbestigasyon sa kabomberohan sa sunog sa Robinson’s Place sa uptown sa siyudad sa Sugbo niadtong Dominggo sa hapon.

Sa pagkakaron, ang danyos sa gibanabana sa kabomberohan P160 mil apan nagpadayon pa ang ilang pagsumada sa kadaut sa mall.

Si City Fire Marshall Aderson Comar nagkanayon nga ang ilang unang gipagawas nga pagbanabana sa danyos gibase lang sa kadaut sa structure sa mall.

Si FO2 Emiliano Dano, imbestigador sa Cebu City Fire Deparment (CCFD), niingon nga subay sa mga saksi nga unang nadiskitahan ang pagpitipiti sa linya sa kuryente dapit sa kesame duol sa escalator nga tapad sa Bench Boutique.

Ang pinisik nga kuryente didto paingon sa stock room sa boutique nga maoy gipundohan sa mga stock nga t-shirts.

Gikatakda nga ipadala ngadto sa National Bureau of Investigation (NBI) Manila ang fire debris sama sa wires, plastic nga butang, mga plywood ug uban pa aron masuta ang sinugdanan sa kayo.

Molanat pa og pipila ka mga semana una pa makapagawas og resulta ang NBI sa ilang eksaminasyon.

Gibutuyag usab ni Dano nga atol sa ilang pagsud sa mall, ilang nadungog nga nagtingog ang fire alarm sa tindahan ug nagsirit na ang tubig gikan sa water sprinkler.

Apan pipila ka shoppers ug guests hotel nga nahinabi sa Sun.Star Superbalita nagkanayon nga wa sila makadungog og alarm ug wa makasinati sa pag-agas sa water sprinkler.

“Tingali mao pay pagsugod sa sunog, wa pa dayon maka-detect ug smoke ang sprinkler head, mao tong wa dayon makatingog ang alarm, motingog ang alarm kung makasirit na ang tubig sa sprinkler,” matud ni Dano.

Nasayran nga ang insurance company sa Robinson’s maoy mohatag og kantidad sa danyos atol sa maong sunog.

Sa pagkutlo sa balita ug gihimong pakisusi sa kabomberohan, way nakabsan sa kinabuhi atol sa maong sunog apan unang gikataho nga dunay 20 ang naospital.