PASIDAAN sa pagdawat og katabang.

Bag-ong nasud nga katabang sa panimalay, wa pay usa ka oras, nikawat sa P2 milyunes nga kantidad sa kabtangan ug salapi sa iyang agalon.

Si Monica Suson, usa ka American citizen, apan kasamtangang nanimuyo sa Barangay Cabangcalan, siyudad sa Madaue maoy nabiktima.

Ang biktima maoy nitaho sa kasong pagpangawat sa iyang bag-ong katabang sa Mandaue City Police Office (MCPO), hinungdan nga ang kapulisan nipahimangno sa publiko bahin sa pagkuha og katabang.

Sumala sa biktima, nagpailang ‘An-an Renoma’ maoy girekomendar sa iya ra usab nga higala aron mosulod og katabang ug iyang gidawat niadtong Sabado.

Sigun sa iyang asoy ngadto sa kapulisan nga iya kining gisugo dayon ang katabang sa pagpanglimpyo sa ilang balay.

Apan wa niya mabantayi nga nisaka kini a ikaduhang andana sa ilang balay ug gikuha ang kuwarta dihang nakasud sa ilang kuwarto.

Didto nakuha ang nagkadaiyang mga mahalong matang sa alahas nga ang tanan mokantidad og dili mominus P2 milyunes.

Ang gikatahapan nakasibat na sa ilang balay nga wa pay usa ka oras gikan gidawat.

Si Insp. Ramil Morpos sa Investigation Detective Management Branch (IDMB) sa MCPO nipahimangno sa mga tawo nga dili mokompyansa pagdawat og katabang aron dili sila mabiktima.

Kagahapon, si Insp. Morpos nipagawas sa cartographic sketch sa gikatahapan ug miawhag sa mga tawo nga nakaila niini sa pag-report gilayon sa ilang buhatan.

Nagtuo si Insp. Morpos nga posibling nangalyas lang ang maong babaye ug anaa pa kini dinhi sa Sugbo.