Nerza ug Ambasa, nanguna sa Energizer Night Race

NANGUNA gihapon ang banggiitang sila Anthony Nerza ug Monalisa Ambasa sa gihimong Energizer Night Race didto sa SM City parking Area, pagawas ug pabalik ning siyudad sa Dabaw niadtong Sabado.

Si Nerza nga pambato sa Brokenshire ug gold medalist sa 2011 Private Schools Athletic Association (Prisaa) bag-uhay lamang miabot gikan Zamboanga, mi-oras sa maong lumba dagan og 34 ka minutos ug 03 ka segundo aron mabulsa ang titulo sa men's 10K ug gibulsa ang P10,000.

Gipildi ni Nerza ang kauban niini sa maong tunghaan nga si Arnie Macañeras nga nabutang sa ikaduhang pwesto, gihuman ang dagan sa 36 ka minuto ug 22 ka segungo ug gisundan kini sa taga-Tagum nga si Joseph Van Yap (38:38).

Nakadawat si Macañeras og P7,000 samtang si Yap nabulsa ang P5,000.

Samtang sa babayeng bahin sa 10K, si Monalisa Ambasa ang nakasungkit sa titulo nga mi-oras og 43:25 diin gipildi niya ang pambato sab sa Brokenshire nga si Criselyn Jaro kinsa mihuman og 44:47 ug si Sacha Diaz sa ikatulong pwesto sa oras nga 52:35.

Sa 5K, sila Brian Lupio ug Cynthia Jaro ang nahimong kampyon. Si Lupio, estudyante sa Holy Cross Davao College (HCDC), mi-oras og 17:01 sa men's event gisundan ni Elmer Bartolo (17:18), ug ang ikatulo si Tagum City's Joebert Carolino (17:36).

Samtang si Jaro mi-oras og 20:49 aron makuha ang titulo sa women's 5K, sunod si Cellie Rose Jaro (24:05) dayon sa ikatulo mao si April Rose Diaz (25:08).

Sila Roy ug Emmanuel Leonor sa University of Mindanao (UM), nakuha ang unang duha ka pwesto sa men's 3K division. Si Roy nahuman og 09:14 samtang si Emmanuel misunod nga may 09:15 ug si Joselito Dugos sa HCDC may (09:17) nga anaa sa ikatulo.

Sa babayeng 3K category, si Diane Memoracion maoy nanguna og nahuman ang lumba og 11:00 nga gisundan ni Betheloise Moralde (11:08) ug third-placer si June Gayramara (12:07).

Ang unang tulo nga nakatapos sa luma nakakuha og premyo nga P10,000, P7,000 ug P5,000 sa sunod-sunod nga posisyon. Gihatagan sab sila og medalya ug Energizer gift packs.

Samtang, napalingaw ug misalmot sab sa lumba dagan nga may 2,600 ka partisipante ang mga Kapuso stars nga sila Daniel Matsunaga, Will Devaughn, Michelle Madrigal ug Nadine Samonte. (Marizz S. Robilla)