DUHA ka mga gituohang sakop sa rebeldeng New People's Army (NPA) nasikop sa mga sakop sa kapulisan sa siyudad sa Panabo, Lunes sa hapon.
Mga dinakpan nailhan nga mao sila Armando Angcajas, alyas Toto, 42, molupyo sa Barangay Tibulao, lungsod sa Carmen ug si alyas Gerald, molupyo sab sa nahisgutang lugar.
Sumala ni Police Officer 3 Rodney Villacencio sa Panabo City Police Station nga nasiplatan matud pa sa usa ka police asset sila Angcajas ug Gerald pasado ala 1:00 sa hapon sa maong dapit sulod sa usa ka panimalay nga dunay dalang armas.
Daling mitaho sa kapulisan ang asset hinungdan nga gihimo dayon ang pagresponde sa mga otoridad.
Pasakay na unta sa pedikab ang mga suspek sa dihang gipara sila sa kapulisan atol sa gimuntar nga checkpoint sa maong lugar.
Wa na kaipsot ang duha ka mga suspek nga rebelde sa dihang gisikop sila ug gidala sa presinto sa kapulisan.
Nakuha gikan sa duha ka dinakpan ang usa ka kalibre .45 nga pistola ug .38 revolver nga way mga papeles.
Gitanggong sulod sa selda ang duha ka mga dinakpan samtang kasong illegal possession of firearms gihikay na sa kapulisan batok sa mga dinakpan.
Sa paghinabi sa RMN-dxDC ug Superbalita ngadto kang alyas Toto, iyang gisulti nga unom ka bulan siya sa kalihukan una mibiya ug nanarbaho didto sa Zamboanga City.
Sa iyang pagbalik, gisugo siya ni Kumander Parago sa Pulang Bagani Command 1 sa NPA nga ipalikida ang pipila ka sakop sa Civil Security Unit sa Panabo ug mga sundalo.
Hinuon, wa pay gipagawas nga pamahayag ang hut-ong sa rebeldeng grupo aron nga angkunon o ihimakak ang pamahayag ni Angcajas. (Marvin Pineda)