MILUSAD og pag-inspeksiyon ang Land Transportation Office (LTO) ug Land Transportation Franchising and Regulatory Board (LTFRB) sa Socsksargen sa mga bus, depasaherong dyip ug mga L300 vans sa tumong nga kalikayan ang aksidente sa kadalanan atol sa Semana Santa alas 10 sa buntag kagahapon.
Ang pag-inspeksiyon sa mga sakyanan gihimo mismo ni LTO-Socsksargen chief licensing officer Papacan Pacalundo uban sa mga opisyal sa LTFRB-Socsksargen sa mga terminals sa bus ug mga depasaherong sakyanan.
Gitataw niya nga managsama lamang og tumong ang ilang buhatan nga mao ang paghatag og kasigurohan sa mga pasahero nga mobiyahe niining semanaha.
Dugang pa ni Pacalundo, lakip sa ilang gisusi ang kalidad sa mga sakyanan ug kondisyon sa makina nga maoy nag-unang hinungdan sa aksidente sama sa brake system, bosina ug uban pa.
Gitataw niya nga naglakip sa mga terminal nga ilang gisusi mao ang Weena Bus, Husky Transport Bus, mga dyip ug L300 vans sa mga siyudad sa Cotabato, Kidapawan, North Cotabato ug Maguindanao.
Gipaneguro ni Pacalundo nga niining mga adlawa, ilang higpit nga i-monitor ang kahimtang sa mga pasaherong sakyanan sa pagseguro nga walay reklamo bahin sa overloading, over charging ug under charging.
Matud sa opisyal sa LTO-Socsksargen nga magpakatap na sila og mga personahe nga maoy gitahasan sa pagbantay sa kadalanan ilabi na gyud sa mga abusadong drayber diin daghang pasahero ang mamauli sa ilang mga probinsiya niining panahona. (Edgardo Fuerzas)