SUBAY sa 1st Davao Summer Festival sa siyudad sa Davao nga buksan karong Abril 29, gilusad sab sa lokal nga kagamhanan ang "Great Summer Deal."

Sumala pa ni Jason Magnaye, City Tourism Officer, nga nag-unang tumong niini ang partisipasyon sa mga establistamento dinhi nga motanyag sila og mga promos, diskwento, special packages alang ngadto sa mga buot maglulinghayaw dinhi sa siyudad.

Sumala sa opisyal nga sa kasamtangan nagkigsabot na silang sa pipila ka establistamento, airline companies, hotels, malls nga makigduyog sa maong lakang.

"For now, duna na tay gi-istorya about sa plano. Gikan sa plane, sa ilang accomodation sa atong mga bisita, naningkamot ang local government nga ma-compensate ang unsa mang maka-ayo sa ilang pagbisita dinhi sa city dugang pa nga sa kasamtangan, duna nay unom ka hotels nga mipakita sa ilang interes nga makigduyog sa maong katuyuan,” ni Magnaye.

"Magpadayon ta sa pag-encourage sa mga establishments nato nga mo-participate sila, it's for the city's concern man sab," pahayag ni Magnaye.

Nagkadaiyang sports events andam na

Gibutyag sab ni Magnaye nga trese ka klase sa paugnat sa kusog ang masaksihan sa atol sa unang Summer Festival karong Abril 29 ngadto Mayo 19.

Nauna ng giyagyag nga ang katuyuan sa kalihukan mao ang pag-agni og mas daghang bisita nga moanhi dinhi, ma-bibo sab ang siyudad gikan bulan sa Abril ngadto Mayo nga wala kaayoy daghang kalihukan dinhi.

Dugang pa nga ang mga kalihukan sa kapin bulan nga kalingawan nahimo sab nga posible subay sa ayuda sa pipila ka grupo.

"Sa mga events, andiyan yung private sector. We should give credit sa different sports organizations na tumulong sa atin to stage different events. Ang city government nakig-tie up sa mga grupo nga may activities karon summer aron ma-incorporte sab sa atong activity," ni Magnaye.

Pagklaro sab sa City Tourism Officer nga bisan og walay nindot nga sports facility ang siyudad, sports complex, wala kini magpasabot nga di na mamahimo nga mopasiugda og mga aktibidad labot isports ang dakbayan.

"Ang sports kasi will not just settle sa sports complex, naa may mga sport activities nga pwede man himuon nga wala ni. Just like biking competition."

Baruganan sa opisyal nga ang dakbayan sa Davao duna pay mas daghang 'strengths' nga pwedeng ikapasigarbo og dili lamang kini kutob sa pagbaton og sports complex.

Apan pahayag ni Magnaye nga usa sab sa gilantaw karon ni Mayor Inday Sara Duterte nga maka-angkon sab ang dakbayan og sports complex, apan di pa kuno kini ang pokus sa kasamtangan.

"Si mayor nag-agree na to have a sports facility, pero as of the moment, di pa gyud kana ang unang concern sa city. Apan wala magpasabot nga wala na ginahuna-huna sa local government. Siguro og dunay private group who can help, especially sa fund, why not? Pero karon, naka-pokus ang city sa social services and what is good para sa tanan," sumala ni Magnaye.

Ang 1st Davao Summer Festival buksan karong Abril 29 diha sa People's Park diin ang mga nakahan-ay nga kalihukan mao ang mosunod:

Abril 28-30

Tionko Field

Himuon ang PFF Suzuki U23 Mindanao Champiosnhip

Abril 29-Mayo 1

Davao Riverfront Corporate City

13th Davao Horse Show and Competition

Abril 30-Mayo 1

NCCC Mall Open Parking Area

17th NFMC Annual Convention Castrol Motokhana

Mayo 4-6

Tionko Field

PFF Smart Club Mindanao Championships

Mayo 7-8

Tionko Field

Daba Daba Ultimate Frisbee Tournament

Mayo 8

Speed City, Davao Riverfront

Phil. Autocross Championship Series Round 2

Mayo 8

Gaisano Mall of Davao

National Judo Championship - Youth Division

Mayo 14-15

Tionko Field

1st Davao City Host Lions Club Football Festival

Mayo 20-22

Pacho Palos Verdes

Pomelo Tee

Mayo 28-29

Eco. City Celebrity Adventure Race

Ubang kalihukan

Mayo 21

Santacruzan/Hudyakaan sa Summer

Ang 1st Davao Summerfest nga gipaluyuhan sa City Government of Davao, Davao Association of Tour Operators (Dato) ug Davao Tourism Association, inubanan sab sa suporta sa Davao Travel Agency Association, Guide-Davao, Small Hotels Association of Davao ug Davao Airline Operators Association, ug uban pang grupo. (Rhona O. Goc-ong)