NASIKOP sa follow-up operation ang duha ka mga tulisan nga gitumbok maoy responsable sa pagpanulis sa area sa Puerto ning siyudad sa Cagayan de Oro.
Gibalhog na sa Maharlika Detention Cell ang duha ka mga suspetsado nga giilang sila si si Ceasar Kolehiyo, 35, ug Arjohnny Malunggas, 24 pulos residente sa lungsod sa Tagoloan, Misamis Oriental.
Gibutyag ni PO2 Edward Sy sa Police Station 6 (PS6) sa Puerto ngadto sa SunStar Superbalita nga ang mga suspek unang nanulis sa duha ka maghigala nga mao sila si Erly Jane Sacabin, hingkod ang edad, taga Zone-1, Agusan ug higala niining si June Carlo Arcay, hingkod ang edad taga Brgy. Lapasan ning siyudad.
Gihinungongan ang mga biktima og motorsiklo samtang ang backrider maoy nanion og pistola. Gipangayo dayon ang ilang mga cellphone.
Daling misibat ang mnga suspek sakay sa XRM nga motorsiklo nga kolor pula ug plaka nga walay numero. Igo na lamang nga nagpatabang sa kapolisan ang duha hinungdan gihimo ang follow-up operation.
Adlang Lunes nasikop ang duha ka mga tulisan ug narekober gikan kanila ang kalibre 38. Motorsiklo ug usa ka cellphone. Positibo usab nga natudlo kini sa mga biktima sa pagpanulis.
Sa iyang bahin ni PC/Insp. Michael John Deloso maoy bag-ong hepe sa PS6 gibutyag niini nga ang mga suspek maoy responsible sa pagpanulis sa area sa Puerto ug hugot nga gipanawagan niini ang mga nabiktima nga itudlo usab ang mga suspek.
Kagahapong adlawa gikatakdang ipasaka ang kasong robbery ug illegal possession of fire arms ang atubangon sa duha ka suspek. (SVB)