KALUWASAN ug kaayohan sa bata maoy angay huna-hunaon, di ang dakong bayranan sa pribadong tambalanan maoy hatagan og gibug-aton.
Si Cebu City Mayor Michael Rama nipadayag niini human makagawas si Kean Carlo Villarico sa Chong Hua Hospital bisan sa bayranan niining P850,000 nga abagahon sa dakbayan sa Sugbo.
Si Rama atol sa pagpakighinabi sa mga tigbalita wa nibutyag kon asa kuhaon sa City Government ang kwarta alang sa pagbayad sa utang.
Matod niya nga angay himuon nga panig-ingnan sa uban nga pribadong tambalanan ang gibuhat sa Chong Hua gumikan sa pag-release sa masuso.
Ang City Hospitalization and Medication Program (Champ) maoy nakigsabot sa kadagkuan sa Chong Hua human sa tulo ka buwan nga pag-estar ni Villarico sud sa Intensive Care Unit (ICU) sa hospital.
Si Kean usa sa tulo ka mga masuso nga nangapaso sa pagbuto sa incubator sa Cebu City Medical Center (CCMC) niadtong Pebrero 20, 2011.
Ang ginikanan sa masuso nga si Michelle malipayon kaayo sanglit sa katapusan nakagawas na gyud sila sa hospital ug nakabalik na sa ilang pinuy-anan sa Brgy. Talamban.
Paglabay unya sa unom ka buwan, ang iyang anak kinahanglan pang ibalik sa tambalanan alang sa skin grafting sa ulo, nawong ug kamot nga maoy nagrabehan pagkapaso.