DUHA ka mga Korean national nangamatay human mangalumos sa dagat sa lungsod sa Santa Fe, isla sa Bantayan.

Ang duha naglakaw-lakaw sa hunasan sa dihang paingon na motaob ug wa mahibawo nga kantilado ang dapit.

Gituohan sa kapulisan nga di makamao molangoy.

Si Insp. Jaime Tolentino, hepe sa Santa Fe Police Station nga nahinabi sa dyRC ug Sun.Star Superbalita, niila sa mga biktima nga sila si Jang Myong Kyo, 31, ug Jang Hyejung, 27.

Base sa imbestigasyon, ang duha ning-abot sa isla niadtong Dominggo, pasado alas 7 sa buntag ug kasamtangang nipuyo sa balay ni Evelyn Mendoza.

Kagahapon, pasado alas 8 sa buntag, ang duha ning-abang sa usa ka pumpboat nga gidala ni Oriel Mahipos paingon sa barangay Hilantagaan.

Ang Hilantagaan mga 30 minutos nga biyahion gikan sa pantalan sa Santa Fe kon kusog ang bawod ug gibana-bana nga adunay gilay-on nga 2.5 nautical miles.

Sa dihang ning-abot sila sa lugar, ang duha ningsugo kang Mahipos nga andamon ang ilang paniudto samtang ang ilang gisul-ob nga life jacket gihubo ug gibalik sa pumpboat samtang ang duha naglaka-lakaw sa hunasan.

Apan pasado alas 10 sa buntag wa na makit-i ni Mahipos ang duha hinungdan nga nangayo siyag panabang sa mga lumolupyo sa dapit.

Pasado alas 12 sa udto, ang lalake nga si Myong Kyo nakit-ang naglutaw apan nagkulob, samtang ang babaye nga si Hyejung nakit-an sa ilawom sa tubig nga nagkulob.

Matod ni Tolentino nga posebling naabtan sa taob ang duha ug wa makahibaw nga kantilado ang lugar kun mokalit lang sa paglawom ang dapit.

“Usa ani nila dili gyud siguro makamao molangoy. Unya kining usa mitabang siguro pero naapil pud og kalumos hinuon,”asoy ni Tolentino.

Apan dako ang iyang pagtuo nga kon wa lang gihubo sa duha ang ilang life jacket di gyod kini malumos.

Ang kapulisan nga nakahibawo sa hitabo daling miadto sa lugar apan ilang naabtan nga gikawas na ang lawas sa baybayon.

Ila kining gidala sa Bantayan District Hospital, apan gideklarar ni Dr. James Najaro nga patay nang nidangat sa tambalanan.

Nagtuo ang mga mananambal sa Bantayan District Hospital nga pagka-lumos maoy hinungdan sa kamatayon.

Apan ang kapulisan sa Santa Fe padayon pa sa ilang gihimong imbestigasyon aron matino kon wa bay foul play ang hitabo.

Ang kapulisan nakig-alayon na sa embahada sa Korea aron makuha ang patayng lawas sa duha nga anaa pa sa punerarya sa Bantayan District Hospital.

Ang isla sa Bantayan ilabi na ang lungsod sa Santa Fe maoy sagad suroyan sa mga turista tungod sa nindot niining kadagatan ug kabaybayonan ilabi na karong Semana Santa.