SAMDAN ang usa ka sundalo human mibangga ang iyang gidraybang motor sa usa ka trak de karga didto sa National Highway, Barangay Tibagon, lungsod sa Compostela, Comval Province, Martes sa buntag.
Nailhan ang biktima nga mao si Sergeant Raniel Lorindo, 34, sakop sa 72nd Infantry Battalion sa Philippine Army.
Sa report gikan sa Comval Province Police Provincial Office, nasuta nga nahitabo ang aksidente pasado alas 7:00 sa buntag sa dihang nag-drive sa Honda XRM nga motor si Lorindo nga dunay plate number 3017 LD ug padulong siya sa lungsod sa Pantukan.
Pag-abot sa maong dapit, mibangga siya sa usa ka Mazda trak de karga nga dunay plate number MED-766 ug gidrayban sa usa ka Gahlid Malipa, molupyo sa Barangay Magsaysay, siyudad sa Mati.
Natumba ang biktima sa iyang motor resulta sa pagkahiagum niya og mga pangos ug bun-og sa kalawasan ug daling gidala sa Davao Regional Hospital sa siyudad sa Tagum.
Samtang ang driver sa trak wa na sab mihimo pa sa pag-ikyas ug mitahan sa iyang kaugalingon ngadto sa mga otoridad.
Gikostudiya sa buhatan sa kapulisan ang duha ka mga sakyanan nga nalambigit sa aksidente. (Marvin Pineda)