Magsuong ulitawo, patay sa bangga

DUNGAN sa paghandom sa pasyon ug paglansang ni Hesukristo sa krus, nagbangotan karon ang pamilya sa duha ka magsuong lalaki human aksidenteng nadisgrasya sa ilang gisakyang motor didto sa Barangay Sinawilan, lungsod sa Matanao, Davao del Sur.

Gibutyag ni Police Officer 3 Josie Silanova, imbestigador sa trapiko, nagbutyag nga banda alas 2:20 sa hapon niadtong Lunes, pauli na ang mga biktimang sila si Dindo, 25, ug Dante Cabano, 21, pulos ulitawo ug lumolupyo sa Purok Santolan, Barangay Tres de Mayo, siyudad sa Digos.

Sakay og motorsiklo ang mga biktima giingong nasaghiran sa laing usa ka itom nga Honda Bravo nga gimaneho ni Joefer Mari Janson, nagpuyo sa Lapu-lapu Extension, siyudad sa Digos.

Gihulagway ni Silanova nga gikan sa Digos si Janson ug padung unta sa lungsod sa Bansalan sa dihang gikasugat niya ang magsuong Cabano.

Maayong pagkalampurnas sa magsuong Cabano sa tunga sa dalan hinungdan nga naligsan pa gyud kini og usa ka geen nga sakyanang Mitsubishi.

Nakahiagum lang og pangos ug bun-og sa iyang lawas si Janson ug gidala sa wa masayring ospital sa maong siyudad.

Misibat ang drayber sa Mitsubishi apan human sa makuting imbestigasyon sa kapulisan, nailhan ra gihapon siya nga mao si Alfredo Agamon, 57, ug lumolupyo sa Mabini Extension, siyudad sa Digos.

Gihan-ay na sab sa kapulisan ang kasong double homicide and damage to property batok kang Agamon didto sa piskalya, sigon ni Silanova. (Dondon Dinoy)