NAGDAWAT karon ong mga aplikante alang sa 64 ka bakanteng posisyon ilawom sa Pantawid Pamilyang Pilipino Program (4Ps) ang Department of Social Welfare and Development (DSWD).

Gipalapdan pa sa 34 ka munisipalidad sa Davao Region nga may kapin 130,000 ka potential beneficiaries ang 4Ps sa ikatulong tuig nga implementasyon sa programa.

Sa suwat pamahayag nga gipaabot ni Carmela Duron, Regional Information Officer sa ahensiya, nga aron mas mapaabot pa ang serbisyo ngadto sa mga recipients, naningkamot sab nga mabutangan og personahe ang mga bakanteng posisyon ang programa.

Sumala pa nga sa kasamtangan sila nanginahanglan og usa ka Regional Program Coordinator; usa sab ka Indigenous People (IP) ug Gender Focal ug tulo ka Social Welfare Officers III.

Tanang aplikante sa mga nahisgutang posisyon gikinahanglan nga Registered Social Workers o gradwado sa BS Social Work nga kurso.

Dugang niini, nanginahanglan sab sila og usa ka Training Specialist I, usa ka Administrative Officer II, usa ka Supply Officer I, usa ka Human Relations Officer I, usa ka Driver/Mechanic, duha ka Monitoring and Evaluation Focals, tulo ka Beneficiary Updates System Focals, tulo ka Grievance Redress System Focals, duha ka Provincial Grievance Officers, duha ka Compliance Verification System Focals, usa ka System Coordinator, dose ka Administrative Assistants ug 29 ka Social Welfare Assistants.

Sa mga nahisgutang area, ang aplikante angay nga gradwado sa bisan unsa nga upat ka tuig nga kurso.

Mamahimo nga mosumiter sa ilang application letters ug resume ang mga interesadong aplikante sa Personnel Unit sa DSWD nga nahimutang sa R. Magsaysay Ave., Davao City sa dili pa ang Abril 25, 2011, Lunes. Alang sa dugang kasayuran mamahimo nga i-kontak si Loreta Anas sa numerong (082) 227-1964 / 227-8746 / 226-3736.

Himuon ang screening ug deliberation sa aplikante karong Abril 26-27, 2011 alas 9:30 a.m. ngadto alas 4:00 p.m. sa DSWD Regional Office.

Kahinumduman nga subay-subay sa tumong nga matuman ang gisaad nga mokabat sa 2.3 milyones ka pamilya sa nasud ang matabangan, mas gipalapdan pa ang programang Pantawid Pamilya Pilipino Program (4Ps), misuhid na sa ubang bahin sa rehiyon.

Gibutyag kaniadto ni Merlinda Paragamac, Regional Program Coordinator sa 4Ps sa DSWD nga dinhi lamang sa siyudad sa Davao libuan na sab ang gikonsidera nilang 'potential beneficiary' sa programa.

"So far, sa Davao Region lang daghan na gyud kaayo, dinhi lang sa Davao City naa tay 13,993 ka potential beneficiaries as of the moment, apil na diha ang atong IP areas nga Paquibato and Marilog District," pung sa opisyal sa pakighinabi kaniya.

Subay sa datus 59 na sab ka barangay dinhi sa dakbayan ang napailawom sa programa, uban sa paglaum nga kinsa man kadtong tinuoray nga naglisod sa kinabuhi maoy nahatagan sa ayuda nga ilang gikinahanglan.

Ang Tibungco, Bunawan, Marilog district ang may ubay-ubay ka pamilya nga napailawom sa 4Ps.

Usa ka poverty-reduction program sa nasyunal nga kagamhanan nga gipatuman sa DSWD ang 4Ps.

Ang programa maghatag og conditional cash assistance sa pinaka-pobre nga pamilya sa nasud nga matala subay sa surbey nga gihimo sa National Household Targeting System for Poverty Reduction.

Ang cash grant nga madawat sa beneficiaries gamiton sa panglawas, nutrisyon, edukasyon sa ilang anak nga nag-edad og zero ngadto 14 anyos. (Rhona Goc-ong)