UPAT ka mga gituohang hold-upper ang nasikop sa San Pedro Police Station human ilang gitulis ang duha ka estudyante.
Ang insidente nahitabo alas 4:30 sa kaadlawon niadtong Dominggo didto sa Malvar Street, Barangay 7-A Poblacion, dakbayan sa Davao.
Ang upat ka suspek gipang-ila sa kapulisan nga sila Jay Salcedo, 21, taga Sta. Maria, Davao Occidental; Romel Gimo Roxas, 21, taga Barangay 39-D, Davao City; Leonardo Suralta Edusma, 19, nagpuyo sa Padre Gomes Street, Barangay 33-D, Davao City; ug Elmer Awing, 18, taga Barangay 39-D.
Nasayran nga nagbaktas sa dapit ang duha ka biktima nga sila Jovenio Cael, 19, ug Kent Harvey Hernandez, 19, pulos nagpuyo sa Artiaga Street, ning dakbayan diin kalit silang gipangdala sa ngitngit nga bahin ug mideklara ang mga suspek nga tulis.
Daling nakapangayo og panabang ang mga biktima sa mga residente hinungdan nga nasikop ang mga suspek ug gipang-endorso sa kapulisan.
Narekober sa posisyon sa mga dinakpan ang mga cellphone ug uban pang mga mahalong gamit sa mga biktima.
Gihikay na sa kapulisan ang kaso nga ipasaka batok sa mga dinakpan.