Nalzaro: Temporary mayor

BISAN ning adlaw sa pagpamalandong nunot ning atong pag-obserbar sa mga adlaw sa Semana Santa, wala gihapoy hunong ang panag-away sa pulitika sa pipila ka mga pulitiko dinhi sa ato. Si Kongresista Tomas Osmeña misaway gihapon ngadto kang Mayor Mike Rama.

Samtang si Gov. Gwen Garcia maoy gipasanginlan sa mga anak ni Vice Governor Greg Sanchez, kinsa naghambin karon sa sakit nga lung cancer,  nga maoy naka-ingon sa kahimtang sa panglawas karon sa bise gobernador.

Padayon nga misaway si Tomas ngadto ni Mike labi pa sa isyo sa South Road Properties (SRP). Gusto ni Mike nga ibaligya ang mga nahibiling luna sa SRP karon ngadto sa mga intrisadong kapitalista. Apan dakong supak si Tomas hangtod nga dili makasugod sa pag-develop ang Filinvest Inc., ug ang SM Prime Holdings sa maong lugar. Sa ingon, kon makasugod na sila, mosaka ang presyo sa yuta diha. Pero ang kang Mike, kon adunay mopalit makamugna kini ug employment.

GAMITON PULITIKA

Gipasanginlan ni Tomas si Mike nga gamiton lang niini ang SRP panahon sa eleksiyon.

Pastilan si Tomas morag wala man mogamit usab sa maong luna alang sa pamulitika. Unsa may gustong Tomas nga siya ra ang makabenipisyo sa SRP og dili ang uban? Kinsa may naghatag niya og funding sa eleksiyon nga makagasto siya ug dakong kantidad? Unsa may iyang tarong og lihitimong pangita? Aber? Pamahin sab tawon ngadtong Mike Mas uy.

Aw, gusto niyang pi-angan si Mike karon daan aron dili na kini makalihok sa umaabot nga eleksiyon. Pi-angan sa funding. Kay unsa god intawoy ikagasto anang Mike kon walay mohatag niya og campaign funds. Pareho ra na sila. Si Tomas lang nakabentaha. Kay mobalik man gyud daw si Tomas. Kay matod pa niya temporary mayor ra man daw si Mike. O, Mike, klaro na ha? Mao nga pangandami gyud na.

GIBASOL

Gikonpirmar na sa mga anak ni Vice Gov. Greg Sanchez nga naghambin og lung cancer ang bise gobernador karon. Pero naningkamot gihapon ang bise gobernador nga maka-recover sa iyang panglawas. Manghinaot lang usab kita mga malampasan sa vice governor kining pagsuway nga iyang gi-atubang karon. Siguro resulta na kini sa pagka-heavy smoker ni Sanchez. Pero daghan kog nahibaw-an nga kusog manigarilyo, wala man pod magkasakit ning maong matang sa balati-an.

Pero ang nakaporke lang pud kay gisingitan og pulitika ang mga pamahayag sa mga anak ni Sanchez. Tiaw ba nimo kanang si Gov. Gwen Garcia man daw ang naka-ingon nganong misamot ang gihambin nga sakit ni Greg. Kay naluwatan kuno ni Gwen nga himoon niyang miserable ang kinabuhi ni Greg ug naapektuhan ang panglawas sa bise gobernador. Kuyaw diay kontrahon ni si Gwen kay magsakit man ang kontra. Tan-awa si Tomas. Pamalandong mo uy yawat makuha-kuhaan atong mga sala.

(bobby@sunstar.com.ph)