DEAR Noy Kulas,

Tagoa lang ko sa ngan nga Zenny, taga dakbayan sa Sugbo. Batan-on pa ko ug taas og panglantaw sa kinabuhi. Apan nasugamak ko sa usa ka lalake nga di unta angay nga mahalon kay dako siyang minyo.

Dihang nahibawo ko ako siyang gibuwagan bisan sakit kaayo. Apan hangtod karon nag-antos gihapon ko sa kamingaw tungod kay ako man siyang gimahal. Naglisod gyud kog maayo tungod kay bisan unsaon nako paghikalimot kaniya, naglisod man gyud ko.

Unsa may akoang buhaton?

ZENNY

Zenny,

Maayo kaayo nga imo siyang gibuwagan dihang imong nasayran nga minyo diay siya. Sakit man tuod kaayo nga imo siyang gibuwagan bisan imo siyang gihigugma, ang inyong relasyon wa man sab guy padulngan tungod kay duna na siyay pamilya. Sa ingon niani nga relasyon, pulos pilde ang both sides.

Ngano man? Kon ang lalake mokuyog man kanimo, the fact remains nga kabit ka lang bisan unsaon pa sa pagbali-bali. Naguba ang imong pagkatawo ingon man ang imong reputasyon ug sa imong pamilya. Kon wa ka man makahuna-huna sa imong kaugalingon, think of your family nga mauwaw ug natural masakitan kon nagpadayon man ang imong relasyon.

Ikaduha, nakaguba ka og pamilya. Sa tibuok mong kinabuhi pagadad-on mo ang burden nga naghimo kanimong destroyer sa pamilya. Di lalim ang maghuna-huna nga tungod kanimo, dunay asawa ug mga anak nga nasakitan kay nabiyaan.

Ikatulo, sagad sa ingon niana nga relasyon, wa say kalinaw ang inyong pagpuyo kon ingon niana ang inyong relasyon. Ngano man? Ang dagan sa inyong huna-huna ingon ani.

Kon siya gani nakaako sa pagluib sa iyang asawa nga iyang pinakaslan, unsa na kaha ikaw nga kabit lang sab? Siya mao usab. Kay nakaluib man siya, maghuna-huna sab siya nga kon nakapanglimbong siya, manglimbong ka sab. So, magdudahay mo nga maoy makaingon sa away. Basta naa ang distrust, way kalinaw ang relasyon.

Natural man nang masakitan, mingawon ug uban pang pagbati tungod kay ingon niana man gyud ang atoang bation kon mawagtang ang tawo nga gimahal. Eventually, you will get over sa imong pagbati nga di mo lang mabantayan. Ayaw lang gyud pagpadali sa gibati kay sa ako nang gikaingon nga ang imong padulngan di gyud maayo. You are still so young and naïve. Ayaw gub-a ang imong kinabuhi tungod lang kay nag-uros uros ang imong pagbati. Kon magpadala ka, imo ra ning pagabasulan.

NOY KULAS