NIABOT na ang halogen lamps nga ihulip sa gooseneck lamp sa pediatric ward sa Cebu City Medical Center (CCMC).
Si Dr. Lee James M. Maratas, pangu sa pediatric ward, nitug-an sa Sun.Star Superbalita nga lima ka mga halogen lamp nga wa pa matino ang kinatibuk-ang kantidad ang niabot.
Ang halogen lamp mao nay gamiton sa CCMC isip paghatag og kainit sa mga masuso nga ipanganak nga pre-mature diha sa pedia ward.
Si Maratas mapasalamaton kaayo sa Siyudad sa gipakitang ayuda sa pampublikong tambalanan.
“We are very happy that the city government has supported us. The halogenated lamps will replace the old gooseneck lamps,” matod sa text message ni Maratas.
Kahinumduman nga niadtong Pebrero tulo ka mga bata ang nangaangol ug duha ang nagrabehan sa pagbuto sa karaang gooseneck lamp.
Usa sa tulo ka masuso bag-o lang nakagawas gikan sa Chong Hua Hospital bilin ang P850, 000 nga bayranan nga pagaabagahon sa dakbayan sa Sugbo.
Si Mayor Michael L. Rama sa iyang bahin daw nakumbinsi sa mga testimoniya sa mga doctor ug staff sa CCMC nga usa lang gyud ka disgrasya ang nahitabo.