NANGAANGOL ang mga drayber sa motorsiklo ug traysikel human nga nagsungag ang ilang mga motor niadtong adlaw'ng Biyernes.

Nalambigit sa aksidente ang traysikel nga Kawasaki, kolor pula, nagbaton sa plakang XF 3406 ug gipanag-iyahan ni Emmanuel Magpuyo Sr., lumolupyo sa Barangay Southern Paligue, lungsod sa Padada, Davao del Sur nga gimaneho ni Junelviz Ferinal Donayre, 31, ulitawo nga molupyo gihapon sa maong dapit kon diin nakigsungag sa Honda XRM, kolor pula, nga dunay plate number LK 6362 ug gimaneho ni Sherwin Portabis, 30, ulitawo.

Ang motorsiklo ni Portabis nakarehistro sa ngan sa iyang ig-agaw nga si Ricky, nagpuyo sa Barangay Harada Butai sa maong lugar.

Subay sa taho ni PO1 Ramil Locostales, imbestigador sa trapiko, nahitabo ang insidente alas 4:35 sa hapon niadtong Biyernes didto sa Barangay Quirino District, Padada.

Tungod sa kakusog sa impak, mga drayber sa mga nahisgutang motor nangalagpot sa nakaparadang multicab nga gipanag-iyahan ni Christian Rey Revilla, taga 711 Quirino District sa nahisgutang dapit.

Sumala pa nga ang traysikel gikan sa Barangay Clarin ug padung unta sa Quirino apan wa makabantay sa gihinagbo nga motorsiklo nga kalit nga niliko hinungdan sa disgrasya.

Mga biktima nakaangkon og pangos ug bun-og sa kalawasan ug gidali sa pagdala sa Baron-ye Clinic.

Padayon pa ang gihimong imbestigasyon ni Locostales aron nga masayran kon kinsa ang sad-an sa disgrasya. (Dondon Dinoy)