ANG unang Davao Summer Festival di lamang puro paugnat sa kusog, apan kini sab usa ka dalan nga mapromotar ang kultura ug musika dinhi.

Subay sa kapin bulan nga kalihukan, masaksihan sab sa kadaghanan ang Music Festival dinhi sa siyudad.

Sumala pa ni Konsehal Al Ryan Alejandre, sa ikaduhang distrito ning siyudad nga ang gipasiugdahan nilang Music Festival himuon karong Mayo 9-15 ning kasamtangangang tuig.

"It will be fun, kay daghan og makita ang atong mga bisita nga moanhi dinhi sa atong unang summer festival," pahayag sa konsehal.

Ang Music Festival himuon diha sa Bolton Street ning siyudad, diin ang kalihukan gitawag sab nila nga 'Kaan Dawit.'

Dugang pa nga nag-unang atangan niini mao ang mga local talents dinhi nga maoy manguna, mohatag sa ilang performances matag gabii.

Ni Alejandre nga giduol na nila ang grupo sa mga local artist sa dakbayan aron matabangan sila sa maong katuyuan.

"Miduol na ta sa Samahan ng mga Musikero sa Davao aron makatabang sila nato, sa local goverment nga mapaila-ila sab nato ang atong mga local talents," batbat sa konsehal.

Ang Kaan Dawit sama og konsepto sa konsiyerto nga ginahimo matag Araw ng Dabaw ug Kadayawan Festival dinhi, diin samtang nalingaw og kaon ang mga dumuduong tungod duna say mga booths nga i-muntar, malingaw sab sila sa musika nga idalit sa mga local talents.

Pahayag sa konsehal nga pamaagi nila kini aron nga mapaila-ila nila ngadto sa kadaghanan nga dinhi sa siyudad sa Davao daghan og talents nga ikapasigarbo gyud.

Ang unang summer festival sa Davao City buksan karong Abril 29 ug matapos karong Mayo 29.

Uban sa kapin bulan nga kalihukan nagkadaiyang kalihukan sab ang gi-andam sa lokal nga gobyerno katambayayong ang lain-laing grupo aron kini magmalampuson.

Pipila sa mga kalihukan mao ang PFF Suzuki U23 Mindanao Championship, 13th Davao Horse Show and Competition, 17th NFMC Annual Convention Castrol Motokhana, PFF Smart Club Mindanao Championships, Daba Daba Ultimate Frisbee Tournament, Phil. Autocross Championship Series Round 2, National Judo Championship - Youth Division, 1st Davao City Host Lions Club Football Festival, Pomelo Tee, Eco. City Celebrity Adventure Race, Santacruzan/Hudyakaan sa Summer.