ANG buhatan sa Davao del Norte Electric Cooperative (Daneco) nagsugod na karon sa ilahang dry run alang sa giplano nilang pre meter sa mga kunsumante.

Sumala ni Allan Lanida, IDS senior manager sa Daneco nga gisugdan nila ang maong dry run sa Ferrarin Subdivision, Barangay Magugpo South, siyudad sa Tagum.

Giduso sa Daneco ang maong pre paid bill sa ilang mga kunsumante aron dali na lamang alang kanila ang pagpaningil sa mga bayrunon sa kuryente.

Mopalit na lamang og mga pre paid card sama sa telepono ang mga kunsumante aron makagamit sila og suplay sa kuryente.

Puwede sab nga mopalit og advance nga card ang mga konsumante aron walay putol-putol ang paggamit nila og kuryente.

Walo ka mga panimalay sa maong dapit ang nabutangan og pre paid nga metrohan sa kuryente.

Atol sa dry run misaksi ang mga personahe gikan sa National Electrifiaction Admintration NEA, mga board of director sa Daneco ug uban pa.

Dugang ni Laniba nga ugaling molampos ang maong dry run ilaha kining ipatuman sa tanang konsumante sa Daneco. (Marvin Pineda)