USA sa mga pangutana nga sagad akong masugatan sa mopalit og mountain bike, mao ang unsay maayo, mas dako o mas gamay nga frame. Di man ko expert, nag-research ko bahin sa unsay maayo nga size.
Maayo ang fit gyud sa size. Ang size sa bike gibase sa gitas-on sa seat tube. Sa akoang 5’4” nga height, size 15 gyud ang haom. Apan sa frame sa Giant, 14.5 ang haom nako kay taas ra sab ang 16-inch frame. Ang akoang frame nga daan size 16 nga kon akong sakyan, medyo taas og gamay.
Debate
Naay debate lagi nga unsa kunoy maayo, mas dako o gamay. Daghan ang ganahan sa mas gamay, kon di man gani fit sa size, mas daghan ang ganahan og mas gamay nga frame.
Base lang sa akoang experience, mas ganahan ko sa gamay nga frame kay sa dako. Kon maneuverability ang hisgutan, mas maayo ni kay sa dako. Sa subida, mas comfortable ko kay sa akoang 16-inch frame, itandi sa akong duha ka nangaging frames nga 14 ug 15.
Si Amper Campaña, amoang Sun.Star photographer, ingon niya wa gyud siyay problema sa mas gamay nga frame niya nga 13-inch. Si Sun.Star photog Allan Defensor, kinsa road biker na sukad niadtong 1996, niingon nga mas maayo ang gagmay nga frame size itandi sa mas dako.
Ingon pa sa mga pabor sa gagmay nga frames, “ang gamay imong mapadak-an. Ang dako di nimo mapagamyan.” Buot ipasabot, ang seat post imong mapatas-an samtang ang stem mahimong motaod ka og mas taas.
Folding bike padung Cantipla
Gimatuod sa akoang mga amigo nga sila si Allan Defensor, Rodjard ug Abu, nga sama nako folding bike enthusiast, nga sa mga kamot sa hanas nga biker, makaya sa folding bikes ang pagtadlas sa kabukiran.
Tuod man, kauban sa amoang mga higala nga mountain biker, ilang gisubay ang amoang rota niadtong Abril 3. Nisaka sila sa Manipis road, dayon misaka sa Sudlon 1, Sinsin, Cantipla sa Brgy. Tabunan, ngadto sa Malubog una pa sa Busay dayon sa Lahug.
Naay pipila nga mountain biker nga ming-surrender, apan ang tulo nako ka mga amigo wa gyud. Ilang gitiwas ang rota bisan sa pipila ka mga kakulian sakay sa ilang folding bikes.
Di ko mahibung ani nilang Allan ug Rodjard nga kusgan kay karaan ni sila nga road biker. Si Allan ang nagtudlo nako sa ka importante sa pag-practice og spinning gikan sa Cebu City ngadto sa Carcar ug balik niadtong Holy Thursday sa 2010. Siya sab ang nanudlo sa amoang mga kauban nga photographer sa Sun.Star.
Maayo kon magsige og kuyog si Jay Garganera sa mga ride nilang Allan aron makasuway siyag subida sa mga bukid sakay sa usa sa iyang mga collection.