Doy M. Abellana
Cebu City
“ASA na man ang 50 porsyento nga atong gikasabutan? Dili man diay ka ligdong tawo nga ikasabot, Die! Nakaminos ka nako? Wa man kay tahod ug respeto sa kadagkuan sa among kapunongan. Mora man hinuon og ikaw maoy nakatag-iya sa among kapunongan nga maoy gigamit mo pag-solicit uban sa imong mga solicitor. Kurakot man diay kang dako!” prangkang mga pulong ni Joel kang Eldie Patig, kinsa nasuko ug miandar hinuon kaniya.
Ania karon si Joel sulod sa panimalay ni Eldie Patig aron makighusay sa ‘remittance’ sa ilang na-solicit nga mga ‘sponsor.’ Daling migula si Joel sa balay ni Eldie Patig ug misibat paingon sa gawas. Wa siyay bawot kon tubayan niya ang edarang ‘blocktimer’ sa panibya sa radyo ug nainila sa iyang sinemanang indigay sa awit sa radyo.
“Unsay 50 porsyento nga bahin? Asa ka? Dako kog gasto! Igo na nimo kanang 3 porsyento nga sharing sa solisitasyon. Tingalig nagtuo ka nga nakakuwarta ko, Joel!” nagpaninggit si Eldie Patig nga nagwara-wara sa iyang mga kamot samtang gialam-alaman sa gikapuyo niyang babaye.
Way lingi-lingi nga milabang si Joel sa dalan aron mosakay og traysikol. Nakapanglingo siya. Wa gyud siya magdahom nga labihang kurakuta diay ni Eldie Patig. Dala niya karon ang tanang listahan sa mga sponsor nga na-solisit nila ni Eldie Patig ug sa iyang mga ‘solicitor’ alang sa ipahigayong tinuig nga tulumanon sa Siete Palabras nga gipasiugdahan sa kapunongan nga gisakupan ni Joel. Hilabihang daghana sa mga esponsor. Dili gayud makalimod si Eldie Patig sa naabot nga kantidad sa ilang na-solisit tungod kay anaa man ang ‘rate’ nga giaprubahan sa mga sponsor. Gawas pa, personal kini niyang gisusi, gipaluap ug gitawagan sa telepono ang mga esponsor usa ka semana sa dili pa ang Siete Palabras sa kahanginan.
Si Joel mao ang sinaligan sa ilang kapunongan sa pag-solisit og mga sponsor alang sa tinuig nga Siete Palabras. Siya usab ang mobayad sa estasyon sa radyo sa upat ka oras nga tulumanon kapin na sa napulo ka tuig. Suod niyang higala si Eldie Patig nga nahimong inila sa panibya ug sa natad sa kalingawan. Panginabuhian ni Eldie ang pag-solisit og mga sponsor pinaagi sa telepono. Telephone brigade ang iyang tirada uban sa iyang mga solicitor. Nahinumdom siya sa ilang panagsabot ni Eldie.
“Joel, mopasulod kog mga sponsor sa inyong Siete Palabras. Okey ba?” ni Eldie.
“Salig ko nimo, Die. Basta ikaw, 50 porsyento ang pangayuon sa kapunongan,” ni Joel.
“Aprub. Pa-solisiton ko dayon ang akong mga solicitor!”
Ug gikan sa mga solicitor ni Eldie Patig nasayran ni Joel ang pinansyal nga problema niini.
“Sa tibuok bulan sa Marso gi-remit namo ngadto kang Sir Eldie ang tanan namong na-solisit sa Siete Palabras.”
“Kaming mga solicitor ug si Sir Eldie maoy nagbahinay og 50 porsyento sa among na-solisit.”
“Naatol nga problemado sa pinansyal si Sir Eldie!”
“Gibayad ni Sir Eldie ang na-solisit namo para sa Siete Palabras sa binulan niyang bayranan sa programa niya sa radyo!”
Nagpanglingo si Joel. Nagpabaga sa iyang nawong si Eldie Patig. Wa siyay ulaw nga migamit sa kapunongan nilang Joel aron maka-solisit para sa Siete Palabras. Mihangad sa langit si Joel nga nagkibot-kibot ang baba.
“Hingpit nang nawala ang akong pagtahod nimo Eldie Patig. Ubos ka na kaayo sa akong panan-aw. Edaran ug senior citizen ka na. Angay kang maghinulsol sa imong mga sala aron aduna pay kaayuhan kanang kagid-kagid nga mitapot karon sa imong lawas, atol sa kasaulogan sa Biyernes Santos!” (KATAPUSAN)