KADAGHAN na ko nag-sulat kabahin sa akong mga hunahuna kabahin niining mo-gradweyt sa kolehiyo ug unsay gipaabot niining nakahuman na karon inig apil nila sa mas dakong katilingban aron manginabuhi.

Pareho-pareho lang ang mga tema. Daghang mga mo-gradweyt karon nga maglisod pagpangitag trabaho labi na kining mohaom sa ilang gipangtun-an.

Pananglitan, pila na karon ka mga gradweyt sa nursing nga nagtrabaho sa mga call center?

Mao bitaw dihang nangadto mi sa ilang mama diha duol sa Fuente Osmeña kilid sa Chong Hua Hospital kay nigradweyt ug usa na ka nars ang akong pag-umangkon nga si Nikka, ang mga pasiaw dayon sa mga tita mao, asa nga call center siya motrabaho?

Nakahinumdom ko kaniadtong nagtungha pa ko nga halos tanang mga gradweyt sa nursing maninguha gyud dayon nga makalarga sa gawas kay tua didto ang daghang oportunidad. Alang kanila, way ayo ang mga hospital dinhi sa atua.

Karon, wa man gihapoy ayo ang motrabaho sa mga hospital alang sa mga bag-ong gradweyt og nursing apan matod pa ni Nikka, interesado sab gyud kanila ang mga call center.

Mao na ni karon, motungha aron mahimong nars ug makatrabaho sa call center.

Apan mas personal pa alang kanako isip ginikanan kining paggradweyt sa akong kamaguwangan nga si Karlo didto sa UP Iloilo. Nag-double course siya og Business Management ug kining Comparative Literature.

Apan mura man kini siya og di interesado sa negusyo kay sama kanako kaniadtong batan-on pa, mas gusto man nga magsulat ug mag-aktibo sa mga kawsa.

Hinuon, kon sulat lang ang hisgutan, nahimo siyang editor-in-chief sa ilang student publication. Iyang na-maintain ang iyang blog sulod sa katuigan ug gani tungod niini, nakaapil siya sa usa ka international conference sa miaging tuig sa Global Voices didto sa Chile.

Ugma, modawat siya og usa ka journalism award sa ilang tunghaan.

Sa iyang pagka-aktibo isip tinun-an, nakaagi na siya sa pagka student council chairman kaniadtong second year pa.

Sa akong panahon, kontento na ko nga nakaapil sa pag-organisa og mga dagkong protesta dinhi sa Sugbo samtang nakataak lang ko og Manila human gidagit si Fr. Romano dinhi sa Sugbo ug nahadlok sila si Papa Doroy ug Mama Nats nga basin maapil sab ko.

Sama sa ubang mga ginikanan karon, makahinuktok kita kabahin sa atong naagian sa pagsiguro nga kining atong mga anak mas makakab-ot pa og labaw sa atong nahimo.

Kon buot hunahunaon, daghan ang pareho gihapon kaniadto ug karon. Apan lahi sab karon kay dunay mga kahimtang sa una nga nisamot. Naay bag-ong sitwasyon nga kita mismong naa na sa gitawag og middle age naglisod sa pag-usab ug sa pag-atubang.

Bisan pa man, malaumon ako sa atong bag-ong henerasyon. Bisan pa man sa mga negatibong impluwensya ug mga panghitabo, atong mabati ang ideyalismo sa kabatan-onan nga mahimong mas maayo pa kining atong katilingban.

Nasiguro ko nga sama kanako sa una, dunay mga batan-on nga maghunahuna nga atong usbon ang tanan ug magsugod gyud sa uno.

Sulod sa katuigan, akong naamgohan nga presko ra kaayo ang maong panghunahuna bisan pa man og mao kini ang akong kaagi. Sulod sa katuigan, atong maamguhan nga mahinungdanon sab gyud ang makat-on sa mga pagtulun-an gikan sa mga kaagi sa atong mga katiguwangan.

Lahi ang kalibotan sulod sa tunghaan ug ang tinuod nga kalibotan sa gawas.