HUMAN sa pagpamalandong nunot sa pag-obserbar sa mga Kristiyanos sa Semana Santa ug taas-taas nga bakasyon, balik na usab kita sa naandan natong gimbuhaton. Ang uban nga didto mag-obserbar sa ilang mahal nga adlaw sa probinsiya, mamalik na karong adlawa aron mangandam na usab sa pagbalik sa trabaho ugmang adlawa. Ug kay karon mao man ang Dominggo sa Pagkabanhaw o Easter Sunday, kadaghanan karon atoa magsaulog sa dagat. Siguradong dugukan karon ang mga beach resorts.
Sa wala pa ang Mahal nga Adlaw, nagpahimangno ang kadagkuan sa Simbahang Katoliko nga ang Semana Santa mao ang adlaw sa pagpamalandong o reflection ug dili adlaw sa tingbakasyon. Dili sa ingon nga misupak ako ning maong pamahayag sa taga simbahan, apan ang tinud-anay nga kamatuoran dili nato mabali-wala. Ang Semana Santa panahon sa tingbakasyon. Apan dili sa ingon nga tingbakasyon ato na lang usab nga kalimtan ang relihiyusong aspeto. Nagpamalandong gihapon kita bisan kon nagbakasyson.
NAGLATAGAW
Dinhi ra ako sa probinsiya sa Sugbo naglatagaw niadtong miaging duha ka adlaw gumikan kay wala lagi trabaho sa radyo, telebisyon ug ning maong pamantalan. Unsaon nga wala man tay igong budget nga ikagasto kon adto ko sa laing lugar mobakasyon. Busa diri ra intawon ko sa lalawigan nagsuroy-suroy. Morag suroy-suroy ni Gov. Gwen Garcia.
Nalingaw kong nakigmimamat sa taga Arpili, Balamban, ang yutang natawhan ni Super Guam Logroño sa DYSS Super Radyo ug correspondent dinhi sa Superbalita. Gi-andaman gyod ko og manok Bisaya sa iyang mga igsuon ug ginikanan. Naka-inum og bahalina gikan sa Leyte uban sa amahan ug uyu-an ni Super Guami. Nahimamat pod nako si Kapitan Emong Paulin. Alegre gamay.
Mihapit kog kadyot sa ila ni Sir Godo Roperos, kolumnista sa Sun.Star, usa ako milahos sa Asturias diin akong naka-uban si Langub Barangay Captain Randy Japitan, akong kumpare si Edgardo Lauro ug ang mga Mahinay family. Alegre gihapon. Bisan mahal nga adlaw, hala sing-al sa videoke nga hulog singko-singko. Manok bisaya mao gihapoy gi-andam ni Kapitan Japitan. Morag gikaspa na ko ani.
SUGAT
Kaganihang kadlawon gipahigayon sa pipila ka mga dagkong parokya ang traditional nga Sugat sa pagkabanhaw ni Hesu Kristo. Unang nabaniog niini mao ang lungsod sa Minglanilla diin gigastuhan gayod kini og dakong kantidad. Pero karon daghan na ang nagpahigayon niini. Gani usa siguro sa gidugukan sa katawhan mao ang Guadalupe. Bag-o kini sa Guadalupe human mabalhin si Msgr. Jose Montecillo. Ang nagsuwat ug nagdirihir niini mao si Super Aljin Abaquita sa DYSS Super Radyo. Gahimo usab kini si Abaquita didto sa lungsod sa Argao niadtong didto pa madestino si Montecillo. Basta si Super Aljin modirihir, aw, lingaw gyod ang manan-aw.
Pero mas kuyaw tong akong usa ka amigo modirihir nga si Rolando Jr. Pilay ato Pareng Lando? Bwahaha. Happy Easter Sunday sa tanan.
(bobby@sunstar.com.ph)