BARANGAY hall sa Tipolo, dakbayan sa Mandaue nasunog, hinuon wa maugdaw tungod kay nadali ra pagpawong sa kabomberohan human nila nadawat ang alarma sa sunog alas 2:40 kagahapon sa kadlawon, samtang gibutang lang kini sa first alarm.

Si SF02 Roy Garcia, imbestigador sa Mandaue Fire Department nga nahinabi sa Sun.Star Superbalita, nibutyag nga ang kayo nagsugod sa ika-duhang andana sa buhatan sa Lupon Tagapamayapa.

Atol sa hitabo way tawo ang ibabaw samtang mga tanod lang ang duty niadtong higayona.

Apan unang nakapasirit og tubig mao ang kaugalingong gamay nga fire truck sa barangay Tipolo.

Sa dihang niabot ang mga bombero wa na kini makadako ug ila nga napawong dayon ang kayo.