WA na mahitsura ang usa ka sakyanan human mahagbong sa 50-ka-tiil nga pangpang samtang naangol ang driver niadtong Biyernes sa tungang gabii sa Sitio Tayong, Barangay Guimbuangan, lungsod sa Barili.
Si Berny Chua Chan, 22, ulitawo, taga Andres Abellana, Brgy. Guadalupe, dakbayan sa Sugbo kasamtangang giatiman sa mga doktor sa pribadong tambalanan sa dakbayan sa Sugbo tungod sa kadaot sa kalawasan.
Si SPO2 Zaldy Urello, desk officer sa Barili police nga nahinabi sa Sun.Star Superbalita, niingon nga ang biktima nag-inusarang nagsakay sa iyang Isuzu Crosswind (YJV 218) gikan sa lungsod sa Moalboal paingon mopauli sa dakbayan sa Sugbo.
Apan sa pag-abot sa dulhugong lugar nawad-an og kontrol sa manobela ang biktima ug wa na mokupot ang brake hinungdan nga nilahos ngadto sa pikas lane sa karsada ug nahagbong sa pangpang nga 50 ka tiil.
Mga residenti sa lugar maoy nitabang sa biktima ug gidali sa pagdala sa tambalanan samtang ang sakyanan niini pwerting pagkagusbata tungod sa kakusog sa impact sa pagkahagbong niini.