GI-PICK UP sa wa hiilhing mga tawo ang duha ka mga lalake nga gipatay sa bukiran nga barangay sa siyudad sa Sugbo ug gisulod sa sako dihang nakaplagan niadtong Huwebes Santo.

Sa wa pa kini gi-pick up, ang duruha nipahibawo nga may duawon sila nga piniriso sa siyudad sa Sugbo.

Ang duha ka mga biktima wa pa mailhi niadtong Huwebes Santo, apan kagahapon giila nga sila si Manuel Edgardo Parawan Jr., 16,ug si Glen Perez Parawan, 32, manag-agaw, taga Sityo Pag-utlan, Barangay Maslog, siyudad sa Danao.

Ang duha nadiskubrehan nga gibaatan og packaging tape ang liog ug mga kamot, may daghang mga samad tinigbasan ug gisulod og sako sa feeds dihang nakaplagan sa Sityo Tupas, Barangay Taptap, bukiran nga barangay nga sakop sa siyudad sa Sugbo.

Ang ilang mga lawas napalgan pasado alas 8 sa gabii niadtong Huwebes.

Si Jinnefer Bunghanoy, usa sa mga lumolupyo sa dapit, nagkanayon nga sa iyang pagpauli uban ang iyang anak nga babaye gikan sa Sityo Kantipla, Brgy. Tabunan, ilang nadungog ang panawag og pakitabang sa usa ka tawo nga mga 40 metros ang gilay-on gikan sa ilang balay.

Kini nagkanayon nga “part tabang, part tabang” nga ingon sa gisakitan.

Tungod sa iyang kahadlok, wa siya moduol sa dapit kay ngitngit.

Iyang gitawag ang iyang mga silingan, hangtud nga naalarma ang komunidad.

Nagpanon ang kalakin-an ug gisubay ang dapit nga gigikanan sa tingog.

Ilang nakaplagan ang mga biktima nga nagbuy-od diha daplin sa dalan nga nagtupad, gisulod og sako nga nabulit sa dugo.

Gialarma dayon sila si SPO1 Teodito Lina nga nadistino sa dapit ug gisuwayan sa pagsalbar ang mga biktima.

Ilang gihulbot ang sako nga gisudlan ug nakita nga may packaging tape ang liog ug mga kamot, may daghang mga samad tinigbasan sa ilang kalawasan.

Ang liog ni Glen diriyot maputol, samtang dagkong samad tinigbasan sa iyang nawong ang naangkon usab ni Manuel.

Napalgan usab sa duol sa mga biktima ang usa ka dakung bato nga nabulit usab sa dugo.

Si Jimmy Parawan, kabanay sa mga biktima, niingon nga nagpahibawo ang mga biktima nga moanhi sa siyudad sa Sugbo aron moduaw sa ilang higala nga napriso sa Fuente police.

Sukad sa ilang paglakaw niadtong Huwebes sa buntag, wa na gyud sila mauli.

Nakadawat na lang sila og impormasyon nga gi-pick-up kini pag-abot sa bag-o lang nasunog nga mall sa Fuente Osmena, nianang buntag.

Sa follow-up sa Sun.Star Superbalita, duha ka mga piniriso lang ang anaa sulod sa bilanggoan.

Ang usa ka piniriso alang sa safekeeping ug ang usa nabilanggo human nisuway pagtulis sa usa ka babaye sa B. Rodriguez niadtong Abril 17.

Ang suspek napasakaan og kasong attempted robbery ug nadala sa City Jail niadtong Abril 20 pasado ala una sa hapon.

Wa hinuon matino kon mao ba kini ang duawon unta sa mga biktima.