USA ka notoryus nga kidnaper nadakpan sa otoridad sa alas 6:20 sa gabii niadtong Sabado didto sa siyudad sa Cotabato.

Nailhan sa kapulisan ang suspek nga si Abdulmanan Mabang, alyas Kumander Keneng, sakop sa Pentagon Kidnap for Ransom gang.

Sumala pa sa taho sa Cotabato City Police Office (CCPO) nga gironda sa hinusang puwersa sa kapulisan, 7th Marine Battalion Landing Team (MBLT-7) ug uban pa ang gitagoan ni Mabang sa Salamat Street, Mother Barangay Poblacion.

Nakuha gikan sa posisyon sa suspek ang usa ka kalibre .45 nga pistola, usa ka granada ug mga buhing bala.

Nasikop si Mabang basi sa gahum sa warrant of arrest sa kasong giatubang nga mao ang attempted kidnapping, kidnapping, kidnap with ransom and serious illegal detention, kidnapping with robbery ug extortion.

Si Mabang gitumbok sab nga apil sa grupo nga maoy midagit kang Ading Yu ug Jinkee Yap nga mga negusyante sa maong dapit.

Samtang gisulat kining balita, ang suspek padayong gipailawom sa pagsukit-sukit sa mga otoridad aron nga mailhan ug madakpan ang iyang mga kauban nga naglihok didto sa probinsiya sa Maguindanao, North Cotabato, Lanao del Sur ug mga siyudad sa Kidapawan, Tacurong ug Cotabato. (EF)